MAMAHIMO unta nga responsable ang katawhan sa Davao City kinsa nagaanha sa Hilltop sa Barangay Langub, kay migula ang problema dihang nakita nga arang kahugaw ang maong dapit gumikan sa mga basura nga gipangbiyaan sa mga nag-istambay.
Tungod niini ang Barangay Langub, mopahigayon og curfew hours human nga pipila sa mga tawo nga nag-istambay sa dapit nakasupak sa pipila ka ordinansa ning siyudad.
Kini ang gibutyag ni Barangay Langub Kapitan Leilani Bacalso nga ilang namatikdan nga daghan og moadto sa lugar labi na sa gabii padung sa kaadlawon aron lang magtambay diin bitbit sa mga nahisgutan ang mga pagkaon ug ilimnon.
Ang oras sa curfew mao sab ang oras nga gitagana sa ordinansa sa dakbayan nga liquor ban gikan alas 12 sa tungang gabii hangtud alas 5 sa sayong kabuntagon.
Gawas sa liquor ban, nasupak sab sa mga outsiders nga nag-istambay sa dapit ang anti-smoking sa siyudad.
Nakita sab nga problema mao ang pagkatag sa mga basura gumikan biyaan na lang sa mga nag-istambay sa dapit ang ilang mga botelya sa ilimnon, plastic bottle sa mineral water, mga sudlanan sa junk foods ug mga selopin.
Nasayran nga ginadayo ang dapit gumikan nindot ang talan-awon kay naa kini sa taas nga bahin ug makita ang mga suga sa tibuok dakbayan sa Davao.
Kay ginadayo ang dapit, unta mamahimo kita nga responsable, dalhon nato og balik atong mga basura aron mapabilin ang kahinlo sa lugar.
Ganahan man ka ha kita sa lugar? Sa ato pa, panggaon sab unta nato, dili nato hulaton nga ang lokal nga kagamhanan na sa Davao City ang mobawal kanato nga mag-istambay sa dapit.
Busa, mamahimong responsable mintras dili pa ulahi ang tanan.