PIKIT, North Cotabato -- Tulo ka mga tawo nga nag-inom ang gipamusil-patay alas 6:45 sa gabii niadtong Sabado, Septiyembre 28, didto sa probinsya sa Cotabato.
Giila ang mga nakabsan sa kinabuhi nga sila Andrew Lumibao, 53-anyos, minyo, kanhi Barangay Chairman ug kasamtangan nga Barangay Kagawad, ug ang iyang mga ig-agaw nga sila Roberto Cayona ug Michael Arroyo nga usa ka miyembro sa Barangay Peacekeeping Action Team (BPAT), mga molupyo sa Barangay Takepan.
Gibutyag ni Pikit Chief of Police, Captain Mautin Pangandigan, nga samtang nag-inom ang mga biktima atbang sa usa ka tindahan kilid sa national highway sa Sitio Vilo, Barangay Takepan, kalit lang mibutho ang wala mailhing mga armadong kalalakin-an ug gipamusil sila gamit ang M14 rifles.
Abtik sab nga miikyas ang mga namusil nga misakay og tulo ka motorsiklo paingon sa hilit nga dapit sa Pikit.
Nagresponde sab dayon ang mga sakop sa Citizen Armed Force Geographical Unit (Cafgu) uban ang mga sundalo ug pulis apan wala na nila maabtan ang mga suspetsado.
Dead on the spot ang mga biktima nga natusak-tusak sa bala sa nagkadaiyang parte sa ilang kalawasan.
Dunay mga tawo na nga gidudahan ang pamilya sa mga biktima nga maoy mipatay niini.
Padayon ang gihimong imbestigasyon sa hitabo. (Edgar Fuerzas)