MATANAO, Davao del Sur -- Gikumpirma sa pipila ka mga molupyo nga ang kanhi Kabus Padatoon (Kapa) Community Ministry International Inc., karon Kapa Worldwide Association, miabri na sab ang ilang buhatan dinhi sa miaging semana.
Sumala ni alyas Marites (nagpatago sa bansagon), 37-anyos, nga pipila ka mga tawo ang miadto sa buhatan niini og alegasyong nang pay-in gikan sa kantidad nga P5,000.
Gibutyag sab ni alyas Ging-Ging, taga Barangay New Clarin, Bansalan, Davao del Sur, nga naka-apil og pay-in ang ilang silingan.
Apan, human naka-hearing ang mga nagduma niini nga apil sab silang gihap-an sa mga otoridad, subling nanirado ang maong buhatan.
Gumikan niini, nabalaka ang ubang mga nakabutang sa Kapa nga hingpit na nilang di makuha ang ilang salapi nga gibutang sa organisasyon.
Kahibaloang, ang subling pag-abri sa Kapa sa dakbayan sa Digos mao ang nagtukmod sa mga sakop sa National Bureau of Investigation (NBI) nga dakpon ang gitudlong nagduma niini nga si Board member Arvin “Jun Blanco” Malasa, mga staff, ug mga kawani sa Muews Radio Digos nga iyang gipanag-iyahan.
Hugtanong gilimod ni Malaza ang pasangil sa NBI kay alang niya dili tinuod nga nag-operate ang Kapa.
Apan, sumala pa nga pipila ka mga ebedensya ang nakuha sa mga otoridad nga maoy ilang gibasehan sa pagpasaka og kasong syndicated large-scale estafa batok sa mga dinakpan.