LAMBERTO G. CEBALLOS
Cawayan, Dalaguete, Cebu
SABADO sa gabii. Alas nuybe ang takna. Misulod si Angelito sa Pretty Dove Beerhaus aron pagsusi sa sitwasyon dinhi. Ning nangaging tulo ka semana naukyab man god ang mga molupyo ning gamayng lungsod sa Yukla sa sunod-sunod nga kamatayon sa tulo ka tawo nga mga hubog gikan sa Pretty Dove. Ang ilang mga patayng lawas diha makit-i sulod sa karaang balay nga nahimutang dili halayo sa beer house. Wa nay nagpuyo sa maong balay. Nabaniog nga ang magtiayong Lucio ug Sabel Bampa nga tag-iya niini dugay nang nangamatay. Giingon nga dunay anak nga babaye ang magtiayon apan tua na mopuyo sa Amerika.
Milingkod si Angelito sa lamesa nga nahisuok dapit sa wala. Sa iyang pagsulod ganina ngiob sa iyang panan-aw ang sulod sa ‘watering hole’ kay unawop ang kahayag nga naggikan sa mga bombilya nga ubos og bohiyas ug lain-lain og mga bulok. Karon, naanad na ang iyang mga mata ug nakaklaro na siya sa mga tawo nga duol sa iyang lamesa.
Dihay usa ka GRO nga miduol kang Angelito. Batan-on pa ang babaye. Naaninaw niya ang kaanyag sa panagway niini. Seksi kini nga nagsul-ob sa iyang unipormeng itom nga mini-skirt. “Can you be my guest, Sir?” matod sa babayeng GRO.
“Sure! Nag-inusara ra ko. I need company,” ni Angelito.
Gitawag sa babaye ang weyter,
“Unsay imong order, Sir?” sa babaye nga mitutok pag-ayo kang Angelito.
“Duha lang ka beer una ug mani,”Ikaw, unsay imo?”
“Beer lang sab,” sa babaye nga miyango sa weyter. Gilista sa weyter ang ilang order sa iyang ‘notepad.’ Pagbalik sa weyter dala na niya ang order nilang Angelito.
“Unsay ngan mo, Miss?” ni Angelito nga miipis og beer sa iyang mug.
“Si Marie ko, Sir. Ikaw?”
“My name is Angelito. Just call me Lito.”
“Okey, Lito. I drink to that.”
Nagpadayon ang panag-estorya nilang Angelito ug Marie. Napun-an pa ang beer nga ilang nainom, Wa na si Lito makadiparal sa nanglabay nga mga takna.
“Gusto ka, Lito, manggawas ta dinhi? Adto ta sa dapit nga kita rang duha!” ni Marie.
Gitutokan ni Angelito si Marie. Nakasabot siya sa gusto sa babaye. “Okey,” matod niya nga mipasiklap sa orasan sa bungbong sa Pretty Dove. Alas tres na sa kaadlawon sa adlawng Dominggo.
Didto sa gawas nanakay silag traysikol. Didto sila manaog tungod sa karaang balay sa mga Bampa. Mikuba-kuba ang dughan ni Angelito. Gikulbaan siya.
“Anhi ta dinhi?” sukna ni Angelito.
“Yes. Ako ning nasunod sa akong ginikanan,” tubag ni Marie. “Di ba tua ka sa Amerika puyo?” ni Angelito, “Yes. Bag-o lang ko mibalik aron pag-asikaso sa akong mga kabilin.”
Nanulod sila sa balay ug nanaka sa itaas, sa lawak ni Marie. Gipunit ni Marie ang puspuro sa ibabaw sa lamesita ug gidagkutan ang usa ka kandila. Mibuhagay ang kahayag sa lawak. Gipahigda niya si Angelito sa kama. Naghubo siya sa iyang uniporme ug midulog kang Angelito. Gihagkan niya ang mga ngabil ug liog ni Angelito. Unya may mga tag-as nga tango misubol sa iyang ngipon. Gitangtang niya ang mga butones sa polo shirt ni Angelito. Apan kalit siyang mihunong sa iyang gibuhat. Naatras siya. “Ahhhhhh!” misiyagit siya. May misidlak nga sulaw kaayo sa dughan ni Angelito. Gisampungan niya sa iyang mga palad ang iyang nawong.
Gitan-aw ni Angelito ang pagka usab sa panagway ni Marie.
Kalit kining nahimong tiguwang babaye ug dungan sa paggitli sa adlaw sa silangan, napusgay ang lawas ni Marie Bampa, ang ‘Killer nga GRO’ sa mga hubog.
Gipawong ni Padre Angelito de Dios ang kandila ug nanaog. Gihikap niya ang krus nga pendant sa kuwentas nga nagbitay sa iyang dughan. Siya ang bag-ong Kura Paruko sa lungsod sa Yukla. (KATAPUSAN)