MAKADAGHAN nako makasugat ning pangutana mahitungod sa kahimtang sa atong senior citizens diha sa karsada. Wa man lage magtupong ang atong tudlo mao di tanang senior ang haruhay ang pagkabutang. Ang uban may tigtuklod sa wheelchair nga ilang sakay sakayan. May sakyanan ug may kaugalingon pa gyud nga driver.
Ang kinabag-an kanila nagkalisod. Gani dunay daghan nila wa nay mga anak nga nag-atiman. Nindot paminawon nga giseryoso og maayo sa mga mayor ang pagpatuman sa kamanduan ni Presidente Duterte paghawan sa kadalanan batok sa mga manindahay og ubang sagabal nga nakaapekto sa bul-og sa trapiko.
Ang subong palandungon kay gikinahanglan pa nga momando ang Presidente una mohimo og aksyon nga unta dugay naman kining maong problema. Pero kining kabahin sa mga senior nga gipaabot diri kanako may labot kini sa ilang inadlaw nga gimbuhaton labi na sa ilang pagbiyahe.
Kong may priority lane para sa mga senior, PWD ug mga mabdos diha sa mga mall og ubang balay patigayon, nganong sa karsada wa kini ipatuman? Tutuki ra gud ninyo ang mga dapit nga nag-atang ang mga pasahero sa mga oras nga lisod ang sakay? Naay daghang edaran diha nga nakigtigi sa mga hamtong ug batan-on aron lang makasakay. Pero way bisan usa nga nagpakabana pag-ayuda nga sila masiguro sa pagpasakay.
Ang mga baskog og lawas nga pasahero di man sab magtagad. Mangilog pa hinuon og sakay. Unta to sa mga oras nga lisod ang sakay may priority lane nga angay ipatuman para sa mga senior, PWD ug mabdos, apil na ang mga masakiton. Kasakit ba sa dughan nga magsud-ong sa mga lolo ug lola nga moapil og ilog para makasakay. Dia pay lain. Kining pagpalingkod og mga senior. Kinahanglan pa nga mosiyagit ang konduktor nga palingkuron sila.
Ang uban maglingo-lingo lang. Kasinatian sa dyip, ang pasahero magkalisod paglingkod kay ang bakanting lingkoranan tua man sa luyo sa driver. Kon bakantihan pa lang unta ang lingkoranan duol sa pultahan, wa nay tuhod nga magkuto kuto. Grabe katig-a og kasing kasing ning uban. Sama sa kasinatian ni Baby Jane Salinas nga taga Tinaan, Naga City. Manganakay niadtong nagkasakay mi sa dyip duha ka semana na ang nakalabay.
Pagsakay niya sa dyip wa gyuy niirog aron di na siya mag-antos pagpangita og kalingkoran. Mao nga akong gihangyo ang ubang pasahero nga sila nalay moirog di kay ang manganakay pay magkamang aron makalingkod.
Nakaingon intawon si Baby Jane nga kapait ba ning ubang tawo unta naglingkod naman sila. Pila ra may pag-irog. Mao na mga PUJ driver, kamo may nagdala sa timon, inyoha untang pahinumduman ang inyong mga pasahero palihug sa pagbakante sa lingkoranan duol sa pultahan.
Manghinaot ta nga ipatuman sa city hall ug munisipyo ang pagpalinya sa mga pasahero og pagbutang og priority lane sa mga senior sa mga dapit diin sila mag-atang og masakyan. Sa uban nga way pagpakabana sa ilang kaubang pasahero, unta sa sunod ninyong sakay makonsensiya mo nga nag-atubang samtang naglingkod, sa nagkurog nga mga tuhod sa senior nga nagbarug.
Mosugot ta ug sa dili, moabot man gyud ang panahon nga mahimo nang duha ang citizenship. Filipino citizen ug senior citizen.