DAGHANG mga konsumidor sa tubig sa Metro Cebu ang naglibog kon unsa man gyud ang tahas sa Metropolitan Cebu Water District (MCWD). Mangita sila og supply sa tubig alang sa katawhan o igo na lang sa pag-esplikar nganong way supply sa tubig?
Ang ubang mga konsumidor, tungod sa ilang pagdaginot sa tubig, magdungan na og kaligo sa ilang mga maid. Nagpabilin ang pangutana kon asa silag tubig nga mainom, magamit sa pagpanglaba, pagpangluto ug sa mga inadlaw nga panginahanglan?
Apan nganong naa may daghan nga tubig nga binotelya unya ang tubig sa MCWD kusog pay ihi ug sa di nimo damhon, mapawong pa gyud samtang nanabon ka samtang maligo?
***
Sud sa dugay nang panahon nagpadayon ang problema sa kakuwang sa supply sa tubig sa Metro Cebu. Usa sa akong mga higala niingon nga dihay panahon nga nakadawat siya’g kalendaryo sa MCWD nga dunay hulagway sa usa ka popular nga brand sa bottled water.
Morag nag-ingon ang MCWD nga mao kini ang padulngan. Mamalit na lang ta og mga bottled water o kaha tubig gikan sa refilling stations. Wa sila mangita og water diviner nga makakaplag sa bag-ong mga tinubdan sa tubig.
Ilang gigamit nga hinungdan sa kakuwang sa tubig ang salt water intrusion sa ilang mga pumping stations. Nganong hangtod karon wa man mosagop ang MCWD sa desalination, ang parat nga tubig sa dagat himuong tab-ang.
***
Di ta makaingon nga aron mahimong moderno ang MCWD, kinahanglan nga ang maong ahensiya adunay bag-o nga mga opisyales nga mosagop sa mga bag-ong pamaagi sa water supply.
Tingali, usa sa mga tubag sa kakuwang sa tubig mao ang desalination. Tinuod nga mahal kining maong proseso sa pagkakaron. Pero kon ipunting sa MCWD ang ilang mga resources alang niini, mahimo nga makit-an ang paagi aron maminusan ang gasto niini.
Dunay nag-ingon nga sa mga lugar nga way supply sa tubig, kusog kaayo ang halin sa beer. Maluoy ta sa mga tawo nga mag-agwanta na lang og inom og beer kay way agas sa tubig sa ilang gripo.