BITAW. Dili sad tiaw. Masabot nato ang pagpiyait sa mga drayber sa public utility jeepneys (PUJ) tungod sa agresibo karon nga pagpatuman sa modernisasyon sa transportasyon, daghan gyud ang mapagan labi na sa hingpit nga pag-phase-out sa PUJs ug pulihan og mas ekonomiya ug eco-friendly nga e-jeeneys.
Kini ang dakong isyu sa sektor sa tranportasyon diin karon adlawa ilang ipadayag ang ilang yangungo ngadto sa kagamhanan pinaagi sa paglusad sa nasudnong welga o protesta karon, Lunes, Septiyembre 30, katapusang adlaw sa buwan, ubos sa pagpangulo sa Alliance of Concerned Transport Organization (ACTO).
Dinhi sa Metro Cebu, ang kauban sa ACTO nga Pinagkaisang Samahan ng mga Tsuper at Operators Nationwide (Piston) ubos sa pagpangulo ni Greg Perez niingon nga di mominus 200 ka mga sakop nila ang mosalmot sa tulo ka oras nga picket o rally atubangan sa Land Transportation Franchising and Regulatory Board (LTFRB-7).
Giangkon ni Perez nga di makabalda sa transportasyon ang ilang lihok-protesta human dili tanang PUJ drivers sakop sa ilang grupo. Apan nanawagan siya sa pag-apil sa ilang kawsa nga alang sa mga drayber.
Dunay punto ang grupo sa mga drayber sa ilang protesta apan sa pikas bahin, dako usab ang isyu sa pagpatuman na sa modernisasyon. Ug matag likod sa panahon ngadto sa dakong kausaban nga dili gyud kapugngan, dunay mapagan. Ibalik nato kadali ang atong panumdoman sa pagkapaspas sa tartanilya o parada dihang niabot ang mga jeepney, dili ba napagan sab ang mga kutsero? Mao kini dili maliko nga kamatuoran, kanunay may mapagan matag kalamboan apan ang panahon lang usab ang mopahiluna sa naapiki sa pagtuyok sa tukmang panahon.