MOABOT sa P138 milyunes nga balor sa ilegal nga drugas ang nasakmit sa kapulisan sa tibuok rehiyon 7 gikan sa Septiyembre 1 hangtod 26 nga anti-drug operations.
Ang Cebu City Police Office (CCPO) ang dunay labing daghan nga nasakmit nga mokabat P73.5 million nga balor sa ilegal nga drugas.
Wala pay labot niini ang resulta sa 48 oras nga one time big time operation.
Sa maong operation, naka kuha silag kapin sa P11 milyones nga balor sa gituohang shabu ug mga punoan sa marijuana sa duha ka bukirang barangay sa siyudad sa Sugbo.
Gisundan kini sa probinsya sa Sugbo nga adunay P37.9 milyunes, lalawigan sa Bohol adunay P8.4 milyunes, siyudad sa Lapu-Lapu nga P7.6 milyunes, ang dakbayan sa Mandaue adunay 7.5 milyunes ug ang Negros Oriental nakasakmit og P2.9 milyunes.
Moabot usab sa 2,162.70 gramos nga gituohang shabu ang nakuha sa CCPO ug 45,589 ka stalks sa marijuana.
Sa probinsya sa Sugbo, nakakuha silag 582,0677 ka gramos sa marijuana nga moabot sa P32 Million sa barangay Gaas, lungsod sa Balamban.
Mioabot ngadto sa P49.9 milyunes nga marijuana nga ilang nakuha sa mga plantasyon sa marijuana sa kinatibuk-an nila nga anti-drug operation sulod lang sa 26 ka adlaw.
Matod ni Police Colonel Gemma Vinluan, hepe sa CCPO, nga atol sa ilang mga operation, moabot ngadto sa 25 ka warrant of arrest ang ilang gi-serve diin 24 niini ang ilang nadakpan.
Samtang 35 usab ka drug personalities ang nadakpan sa 28 ka buy-bust diin pipila niini nalakip sa high value target.
Sa gidaghanon sa ilegal nga drugas, matod ni Vinluan, nagpasabot lang nga padayon pa gihapon nga daghan ang supply sa illegal nga drugas sa siyudad sa Sugbo.
“Ibig sabihin marami pa rin talagang drugs na nandito sa atin sa Cebu City,” matod ni Vinluan.
Ang tanang illegal nga drugas nga ilang nakuha diretso kini sa PNP Crima laboratory nga maoy evidence custodian.
Iyang gipasabot nga adunay kaso nga gipasaka sa kapulisan sa mga ebidensya nga ilang nakuha nga angayan nga ang nakuha nga illegal nga drugas ipreserba kini samtang wala pay mando sa korte nga maoy nag hawid niini.
“So kapag ito ay na turn-over na sa crime lab natin crime na ang take charge duon sa evidence di na naming madadala yun pabalik, ang ibibigay sa amin ng crime lab ay yung certification kung nag tugma ba yung figures na ibinigay namin at saka yung tinimbang nila,” matod ni Vinluan.
Samtang, si Police Brigadier General Debold Sinas, pangulo sa Police Regional Office (PRO) 7 estriktong nag-monitor sa mga nakuhang ebidensya sa mga anti-drug operation.
Matod niya, kon adunay mo-submit sa ilang accomplishment nga ang timbang kadudahan, iya kining ipatawag ug mohatag niyag pagpasabot.
Matod niya, nga sa operation, mahimong mohimog magic ang usa ka operatiba sama nalang sa timbang nga 49 gramos sa usa ka pakete dinhi na magduda si General Sinas tungod kay ang drug pushers adunay timbangan nga ang tanang illegal nga drugas sakto sa timbang.
“Diha nimo na mahibal-an ba nga manguha ang police kon dili sakto sa timbang ang gi-submit mao nang amo pangutan-on nganong ingun ana. So far wala pa man na nahitabo,” matod ni Sinas.
Samtang, gipahibawo sa babayeng CCPO director nga sulod sa 82 ka adlaw niya nga nahimong pangulo sa kapulisan sa siyudad sa Sugbo, miabot na sa P180 miyunes ang ilang nasakmit. (AYB)