HUMAN sa igong panahon nga gihatag nga pasidaan, ang Hapsay Dakbayan (HD) sa Cebu City Government nipahibawo nga sugod karong Oktubre 16 ang paghawan sa mga babag nga nasulod sa two-meter easement sa V. Rama Avenue.
Ang HD nga adunay tema nga “Uban ta sa Kausaban: Siyudad ko Hapsayon Ko” gipangulohan ni Raquel Arce, pangu sa Prevention, Restoration, Order, Beautification, and Enhancement (PROBE). Kini giayudahan sa laing 15 ka mga organisasyon, offices ug departamento sa City Hall ug Department of Public Works and Highways (DPWH). Nipahigayon na kini og ocular inspection sa miaging semana gikan sa Barangay Calamba paingon sa Barangay Guadalupe.
Si Konsehal Renato Osmeña Jr., ang gitahasan ni Mayor Edgardo Labella paglimpyo ug pagpanindot sa Cebu City, nidayeg ni Kapitan Michael Gacasan gumikan sa iyang mainitong pagsuporta sa paglimpyo sa Guadalupe bisan kon sa miaging piniliay magkaatbang sila og partido.
Si Osmeña, lumad nga taga Guadalupe, gusto nga himuong modelo ang iyang barangay aron maoy sundon sa kanait nga mga lugar.
“We are here para magpasabot. We are here para mohangyo kanila kay dili ni para sa personal kon dili para sa kaayohan natong tanan,” padayag ni Osmeña.
Ang konsehal niingon nga nakasabot ang mga tawo sa katuyoan sa gobiyerno hilabi na sa mando ni Presidente Rodrigo Duterte nga hawananan ang karsada ug sidewalks.
Si Arce maoy point person sa HD uban sa Cebu City Transportation Office, Barangay Guadalupe ug Barangay Calamba ug ubang mga ahensiya sa gobiyerno. (PAC)