Pagtahan sa mga NPA gilauman

GILAUMAN karon sa mga otoridad ang pagpanganog sa mga walhong grupo ug pagtahan aron sa pagbalik na sa sabakan sa gobyerno.

Nasayran nga lima na ka mga sakop sa New People's Army (NPA) ang nitahan sa Cagayan de Oro Police Office (Cocpo) ning tuiga lang ug giingong duna pay mosunod kanila.

Atol sa press conference diha sa pagpresentar sa media sa magsoon nga nitahan niadtong nilabay nga adlaw sa Barangay Tignapoloan ning siyudad sa Cagayan de Oro gibutyag ni PCol Henry Dampal, City Director nga duna pa silay impormasiyon nga naa pay mosunod sa pagtahan gani duna mismo nakig-koordinar kaniya nga motahan gikan sa Bukidnon ug naglaom nga dagha pa gyud ang motahan.

"We have five sa Cocpo and hopefully daghan pa no kay atong niagi naa man tay duha nga ni-surrender sa City Mobile Force Company and we received also information nga naa poy ilang kauban nga mosunod," matud ni Dampal.

Gidugang usab si PCapt Dennis Ebsolo, hepe sa Police Station 8 (PS8) sa Lumbia diin hain kini mismo nitahan nga ubay-ubay pa ang gilaomang motahan.

"Wala sila naghatag sa exact number but niingon sila nga naa pagyud pipila nga mosunod sa ila," dugang ni Ebsolo.

Gihupay usab ni Dampal ang kabalaka nga nakasulod na ang NPA sa siyudad ug gani niingong makaalarma gyud kini apan dili sa pamaagi nga mahadlok ug angayang mamahimo kining giya sa mga ginikanan aron bantayan ang mga anak nga dili mahitumpawak sa sayop nga ideolohiya.

"Siguro to some extent makahatag ni siya og alarma labi na kung ikaw ginikanan unya naa na karon nadungog nato nga naay mga reports nga ang ilang recruitments naa sa mga eskwelahan so maalarma gyud ta pero dili sa ingon nga alarma kundili makapakita og concern labi na sa mga ginikanan in general wala man tay nakita kay so far very peaceful man ang Cagayan de Oro," dugang ni Dampal.