GILAMOY sa kalayo ang duha ka mga balay human nabiyaan ang gilutong sud-an niadtong Septiyembre 27 mga alas 4:05 sa hapon sa Zone-10C, Zayas, Barangay Carmen ning siyudad sa Cagayan de Oro.
Gipanag-iyahan nila ni Baingan Cinco ug Arman Uting ang maong mga panimalay diin moabot sa P100,000 ang gibanabanang damyos.
Sa pakighinabi kang SFO4 Samson Velarde, hepe sa Fire station sa Carmen gibutyag nga nagsumikad sa kusina nila ni Cinco ang kalayo ug nikuyanap sa silingang panimalay tungod kay pulos ginama sa mga gaang materyales.
Niabot usab sa ikaduhang alarma ang maong sunog ug gideklarang fire-out mga alas 5:15 sa hapon ug swerteng walay nasamdan atol sa maong sunog.
Padayon nga nagpahimangno ang tinugyanan sa BFP nga mag-amping ug magbinantayon aron nga malikay sa susama niini nga mga katalagman.