NAPUPOS na kagahapon, Dominggo, Septiyembre 29, ang tagal sa tanang local government units (LGUs) sa nasod sa paghawan sa mga babag sa dan ug sidewalks sa ilang tagsatagsa ka mga dapit.
Ug ning adlawa, Lunes, Septiyembre 30, ang Departmen of Interior and Local Government (DILG) mosugod na sa ilang pagpangsusi ug ang pangulo sa LGU nga wala makatuman pahamtangan og silot.
Hinuon, daghang LGUs sa Sugbo ang nipadayag na sa ilang kaandam human nakatuman sa 60-ka-adlaw nga luway nga gihatag ni Presidente Rodrigo Duterte alang sa naasoy nga katuyoan.
MANDAUE CITY
Sa dakbayan sa Mandaue, gikan sa 973 nga pagsusi nga mga babag, total nga 877 nga mga babag ang nahawanan sa Mandaue pagkahuman sa 60 ka adlaw human sa mando ni Presidente Rodrigo Duterte nga limpyohan ang mga nakababag sa pampublikong dalan sa tanang mga LGU sa tibuok nasod.
“Oo, It is successful,” gipamatud-an sa DILG City Director, Jhoaden Lucero, sa pasiunang pagsusi sa dakbayan sa Mandaue kaniadtong Biyernes, Septiyembre 27, 2019.
Nasurpresa si Lucero nga limpyo ang mga karsada sa Mandaue. Sigon niya nga sa inisyal nga inspeksyon, nakita niya ang paningkamot sa siyudad sa paglimpyo sa mga dalan bisan pa, adunay mga kalsada gihapon nga nagpadayon sa paglimpyo sa mga dalan.
Naglaum siya nga ang Mandaue mahimong 100 porsyento nga limpyo sa mga babag sa ilang katapusan nga inspeksyon karong adlawa, Septiyembre 30,
Apan, nakasabot ra si Lucero nga aduna pa gyuy mga nagbabag sa kadalanan nga nanginahanglan og taas taas nga panahon aron mahawanan lakip na niini ang mga sementadong balay nga nilapas na sa sidewalk nga kinahanglan pa nga iproseso sa Department of Public Works and Highways (DPWH) ug usa sab ang mga poste sa Visayan Electric Company (VECO) ) ug Philippine Long Distance Telephone (PLDT) ug ang mga tubo gikan sa Metropolitan Cebu Water District (MCWD).
Gitawag na sa siyudad ang atensyon niini nga mga ahensiya aron maaksyonan na ang maong kadalanan.
CEBU CITY
Sa dakbayan sa Sugbo, si Cebu City Mayor Edgardo Labella nitaho nga ang sidewalks sa tibuok dalan Colon nalimpiyo na.
Nihangyo siya og pagsabot gikan sa DILG nga dunay ubang bahin sa dakbayan nga wala hingpit napatuman ang pagpanglimpiyo ug nagpadayon pa kini.
“The City cannot just neglect the poor people. Let’s give them the chance to have their livelihood,” matod ni Labella.
TALISAY CITY
Niabot sa 1,270 ka mga nagkadaiyang klase sa sakyanan ang nasikop ug naisyuhan og citation kay nakalapas diha sa gihimo nga clearing operation sa siyudad sa Talisay.
Ang maong gidaghanon, naggikan sa Hulyo hangtud na sa Septiyembre 15 ning tuiga.
Samtang kapin sa 30 ka stalls diha sa daplin sa dalan o sa sidewalk ang napapahawa, ilabi na diha sa Barangay Tabunok.
Kini tungod sa gihimo nga paghingusog sa kagamhanan sa siyudad sa Talisay sa pagpatuman sa mando ni Duterte.
Sa 1,270 ka mga sakyanan nga na-isyuhan og citation sa City of Talisay Traffic Operations Development Authority (CT-TODA), 1,223 niini tungod sa kalapasan sa no stopping ug no parking.
Ug 47 ang mga nakalapas sa illegal parking, illegal terminal, ug loading and unloading, diin kapin sa 30 niini ang mga na-clamped.
Giangkon ni Talisay City Mayor Gerald Anthony ‘Samsam’ Gullas Jr., nga giuna nila ang Barangay Tabunok, ilabi na sa Tabunok Public Market ug palibot niini aron masunod kini sa ubang mga lugar.
Gisugdan na usab ang pagpahawa sa mga estruktura nga anaa sa giila nga sidewalk diha sa Barangay Poblacion ug Barangay Dumlog.
Atol sa pagkadeklarar sa Poblacion nga discipline zone niadtong Hulyo, ubos sa programa sa Talisay City Police Station, tinabangan sa kagamhanan sa siyudad, ang pagpahawan sa daplin sa dan ang usa sa ilang gihimo.
Ang ubang LGUs seryuso usab sa naasoy nga kampanya. (KFD, FMD, JJL ug FMD)