Kaso sa dengue sa Talisay City misulbong karon

SunStar File
SunStar File

NISAKA og dul-an sa 80 ka kaso na sa mga nataptan sa sakit nga dengue sa duha lang ka semana sa siyudad sa Talisay.

Adunay natala nga 368 ka mga kaso gikan sa Enero hangtud sa Agusto 31 ning tuiga, ug nahimo na kini karon og 445 ka mga kaso sulod lang sa duha ka semana.

Ug hapit 50 porsyento usab ang pagtaas sa gidaghanon sa mga nataptan sa maong sakit gikan sa Enero hangtud sa Septiyembre 14 ning tuiga, itandi sa susama nga panahon sa miaging tuig.

Sa susama nga period sa 2018, adunay natala nga 274.

Ning tuiga, duha ang natala nga nakalas, ikaduha nahitabo niadtong Agusto, usa ka tres-anyos nga bata nga taga Barangay Linao.

Samtang sa miaging tuig adunay usa lang nga patay nga natala.

Matod ni Dr. Lino Alanzado, Talisay City health officer, sa ilang pagsusi sa labing ulahi nga biktima sa dengue sa Talisay, nga ilang gidudahan ang mga kasagingan ug kasagbutan sa likud sa panimalay sa biktima nga maoy posibleng gigikanan sa lamok nga nagdala sa sakit nga dengue.

Hinungdan nga gawas sa mga pagpaaso ug misting, mas gihingusgan nila ang search and destroy.

Matod ni Alanzado, mao kini kanunay nga gipahinumdom nila sa Talisaynon, nga dili magsalig sa mga sa mga fogging ug spraying nga gihimo sa kagamhanan, lakip na ang paghatag og mga net ngadto sa mga tunghaan.

Kay labing epektibo nga pagbatok sa dengue, mao ang pagbungkag daan sa mga posibleng kaitlogan sa mga lamok, ilabi na diha sa mga balay ug palibot sa balay ug mga tunghaan.

Hinuon bisan kon nitaas ang gidaghanon sa dengue cases sa Talisay, gikan sa ikaupat sa susama nga period sa miaging tuig, anaa sa ikalima ang siyudad sa Talisay sa tibuok Rehiyon 7.

Nag-una gihapon ang Cebu City, gisundan sa Lapu-Lapu City, Mandaue City ug Danao City.

Ang Regional Epidemiology and Surveillance Unit (RESU-7), ang nitala na sa kinatibuk-an og 16,855 cases sa tibuok Central Visayas, diin 103 niini ang namatay.

Ang maong gidaghanon ang nisaka og 95 porsyento sa susama nga period sa 2018, nga aduna lang 8,642 ka mga kaso, diin 42 ang patay.

Ang DOH niawhag sa panglimpiyo sa palibot ug pagmintinar sa panglawas. (FMD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph