DI MOMINOS 30 ka mga bus gikan sa Cebu City Government ug pribadong kompaniya ang padaganon karong adlawa sa higayon nga maapektuhan ang transportasyon sa ipahigayon nga strike.
Nasuta nga mas daghang rota sa dakbayan sa Sugbo diin ang mga drayber mga sakop sa militanteng grupo.
Si Mayor Edgardo Labella, nagkanayon nga motabang sa City Goverment ang kompaniya My Bus ug Ceres Bus sa Vallacar Transit, Inc. sa higayon nga walay managan nga mga PUJ gumikan sa welga nga pangulohan sa Alliance of Concerned Transport Organization (ACTO) ug Pinagkaisang Samahan ng mga Tsuper at Operators Nationwide (Piston).
Apan ang mayor niapilar ug nihangyo ngadto sa ACTO ug Piston nga dili ihinayon ang ilang paghunong sa pamasahero sanglit ang maapektuhan mao ang mga yanong mamumuo ug ang libuan ka mga tinun-an nga maglisod na unya og sakay.
Gipadayag ni Labella nga ang strike dili maoy tubag sa ilang problema inay mohimo sila og dayalogo ngadto sa Department of Transportation (DOTr) o Land Transportation Franchising and Regulatory Board (LTFRB) batok sa pag-phaseout sa mga karaang jeepney.
Si Konsehal Dave Tumulak sa south district ug City Administrator Floro Casas maoy gitahasan ni Labella sa pag-andam sa tanang gikinahanglan uban sa pagpakig-alayon sa kapulisan sa kahusay ug kalinaw uban ni Konsehal Phillip Zafra ug Konsehal Joel Garganera.
Ang mga bus nga libre nga masakyan sa mga pasahero labi na mga estudyante ug trabahante, mag-standby sa mga barangay Guadalupe ug Mabolo ug andam modagan sa higayon nga adunay welga sanglit sa maong mga rota adunay mga moapil sa protesta.
Gipaandam sab ni Labella ang mga barangay mini-buses aron maoy moabag sa private buses ug sa City Government.
Kon adunay pagkuwang sa deployment sa mga bus, mahimong makatawag sa Command Center sa 032-262-1424 ug 0947-178-0000.
Si Greg Perez sa Piston Cebu nagkanayon nga adunay kapin o kuwang 200 ka mga drayber ang mosalmot sa nationwide strike dinhi sa Sugbo aron ipaabot ang ilang mensahe ngadto sa gobiyerno ug adunay grupo nga moadto sa buhatan sa LTFRB VII.
Ang mayor niawhag sa LTFRB sa paghimo og legal nga aksyon sa higayon nga dunay kalapasan sa balaud nga mahimo ang mga drayber.
Samtang, ang mga silingang dakbayan sa Talisay, Mandaue ug Lapu-Lapu nasayran nga ninghimo usab og susamang pagpangandam kon grabe ang epekto sa welga sa mga jeep pasaheroan. (B)