PADULONG na mahuman ang unang 100 ka adlaw sa administrasyon ni Mayor Edgar Labella ug, suma pa, mao kini ang panahon nga mapahimutang na ang direksyon sa bag-ong pamunuan basi sa mga inisyatiba niini.
Usa sa importanteng kalambuan sa Siyudad sa Sugbo mao ang paninguha sa paghawan sa mga sidewalk vendors sa dalan Colon ug ubang mga suok sa downtown area.
Hinuon, si kinsa man ang di gusto nga mahapsay ang downtown sama sa gibuhat ni Yorme Isko Moreno sa Manila nga nahawan ang Divisoria ug ang Quiapo sa unang semana pa lang sa iyang administrasyon.
Apan basi sa gianunsyo ni Yorme Isko atubangan sa mga kabus nga namaligyaay, duna dayon silay kabalhinan sukwahi sa nahitabo dinhi sa Siyudad sa Sugbo.
Nilabay pa ang pipila ka semana nga walay klaro ang ilang kabalhinan. Karon lang bag-o nianunsyo ang City Hall nga anha sila ibalhin sa Tabo sa Banay ug ang dili masulod, anha na sa Senior Citizens park atubangan sa opisina ni Mayor Labella.
Dungan niining pag-abog sa mga kabus nga namaligya sa kadalanan, nilihok ang administrasyon ug mga kaalyado pagtabang sa mga adunahang Insek diha sa SRP.
Karong bag-o, akong nasabtan nga usa ka higanteng mall ang gipaboran nga motukod ug modumala usa ka edipisyo diha sa Carbon public market.
Imbes ang Carbon lugar unta nga makapamaligya ang mga kabus sa ilang mga utanon ug ubang mga produkto, gihatag na hinuon kining maong pribilihiyo sa adunahang Insek na sab.
Niining duha ka kalambuan sa Siyudad sa Sugbo, atong nang makita ang padulngan niining administrasyon.
Una, gukdon ang mga kabus. Ikaduha, paboran ang mga adunahan.
Bisan pa man, manghinaot ko nga makaamgo unta ang mga kadagkuan sa Cebu City Hall nga hatagan og pabor ang mga kabus ug dili kining mga adunahan.
PUJ
Alang kanako, gikinahanglan man gyud nga mamoderno ang atong public transport system. Akong nasabtan sa mga drayber ug mga operator og PUJ nga madawat man nila kini. Kana kon dili dalidali-on kay dili baya barato ang mga modernong yunit.
Pila ra man kanang ayuda nga P80,000 mil alang sa pag-angkon niining mga modernong sakyanan nga moabot og minilyon ang kantidad. Di ra ba sab sayon bisan pa man og modangop og kooperatiba.
Dugang pa, kinsa na man ang mopalit pa niining karaang mga yunit nga di na magamit sa pagbiyahi gawas sa mamalitay og scrap?
Mao nga makasabot ako sa atong mga drayber nga moprotesta intawon kay makulban man sila og kun dali-dalion kining giingong PUJ phaseout. (@anol_cebu sa Twitter)