BANGKETA. Niabot na ang panahon nga ang mga sidewalk kon bangketa mahawanan na sa mga naninda. Kaniadto ang tawag sa mga naninda og pagkaon ug uban pa sa kilid sa dalan rolling store, nga sa gabii lang maninda.
Karon, ang mga naninda sa mga bangketa permanente na. Ang uban gani gihimo na nga ilang pinuy-anan.
Ang una nga mabasol sa problema sa mga sidewalk vendor mao ang lokal nga kagamhanan ug ang nahingtungdan nga departamento sama squatter prevention ug OBO, nga wa magmatngon sa ilang trabaho.
Di ni pagtan-aw og ubos sa mga naninda sa kilid sa dalan o sidewalk, apan ang kadaghanan kanila di motuman sa lagda sa pagpanglimpyo. Ang mga naninda atubangan sa VSMMC mga hugawan.
Matag agi nako diha nga dapit ang mga hugaw sama sa plastic, papel ug uban pa nagpasad lang sa dalan. Ingon ana usab ang sitwasyon sa uban dapit nga dunay sidewalk vendors.
Usa sa mga hinungdan nganong mobaha dayon ang kadalanan sa dakbayan sa Sugbo kini tungod kay ang mga hugaw gikan sa mga sidewalk vendors ihagbong lang sa kanal. Mao nga di ta mahibung nganong daghan kaayo ang mga plastic nga manglutaw sa dagat human sa unos.
Tinuod ang pagpaninda sa sidewalk usa ka tarong nga panginabuhian. Apan ang mga sidewalk gibuhat alang sa mga tawo, nga aron di sila makasamok o makabalda sa dalan alang sa mga sakyananan de makina.
Ang mga naninda nakahibawo nga gidili ang pagpaninda sa sidewalk apan ilang gipahimuslan ang kahuyang sa atong panggamhanan. Morag karon pa ni mahitabo nga ang Presidente sa nasud mismo ang nimando sa mga lokal nga opisyal nga kuhaon og balik ang mga sidewalk ug dalan nga gihimo na nga tindahan ug parkingan.
Napupos niadtong Dominggo ang 60 ka adlaw nga gitagal ni Duterte sa mga opisyales sa lokal nga kagamhanan sa paglimpyo sa mga sidewalk nga gitindahan na ug kilid sa dalan nga gihimo nga kaugalingon nga parkingan.
Kagahapon ang unang adlaw sa pagsusi sa mga opisyales sa Department of Interior and Local Government (DILG) kon nakatuman na ba ang mga dakbayan ug lungsod sa mando.
Si Cebu City Mayor Edgar C. Labella ug Mandaue City Mayor Jonas C. Cortes nagpahibawo na sa DILG nga andam na ang ilang tagsa-tagsa ka dakbayan nga susihon sa DILG.
Maayo unta og ilakip sa DILG og susi ang mga dalan sa sulod sa kabarangayan kon tertiary roads aron ilang makita usab ang mga basura nga gibubo lang sa kilid sa dalan sa mga way disiplina nga mga residente.
Hinuon, sama sa giingon ni Mayor Labella nga di nila pasagdaan ang mga kabus nga nanginabuhi sa kilid sa dalan ug sidewalk.