KAGAHAPON mipahigayon og nationwide transport strike ang pipila ka mga transport groups sa nasud. Kini agi og pag-protesta og pagsupak sa nagpadayon nga modernization program sa mga public utility vehicles (PUV) labi pa ang mga public utility jeepneys (PUJ). Ang kahugpungan sa mga operators ug drivers dinhi sa Sugbo labi pa ang militanteng Pinagkaka-isang Samahan ng mga Tsuper at Operators Nationwide (Piston) wala mosalmot sa maong kalihukan. Igo lang silang nag-martsa gikan sa usa ka mall sa North Reclamation Area piingon sa buhatan sa Land Transportation Franchising and Regulatory Board (LTFRB) aron ipadayag usab ang ilang baruganan.
Busa dinhi sa Sugbo wala maporwesyo ang mga sumasakay kay wala may transport strike. Sa ubang mga dagkong siyudad sa nasud labi pa didto sa kauluhan, wala maka-paralyze ang maong transport strike kay dili man tanan ang misalmot. Gawas pa, mi-deploy ang mga LGUs didto sa Metro Manila og ilang mga sakyanan alang sa mga natanggong nga mga pasahero.
Ang mga dagkong bus operators misuporta usab sa hangyo sa kagamhanan nga mo-deploy sa ilang mga buses. Ambot nganong ilang gisupak kining modernization program sa kagamhanan nga maayo man unta kini. Hinoon, akong nabasahan nga bisan ang mga transport leaders sa kauluhan dako mang uyon ani. Ang ila lang gikasahigmuyuan gumikan sa daghang mga requirements nga gisitar sa Land Bank of the Philippines (LBP) diin adto sila mo-apply og loan pinaagi sa pagtukod og kooperatiba. Sama aning requirement nga magbutang og depot o terminal sa ilang mga sakyanan. Mahal daw kaayo ang abangan. Ang ilang singgit labi pa aning mga drivers nga anti-poor kining maong programa kay mga datu ra ang mabulahan ug makulban sila sa kaldero. Dili ba sila gustong mo-level up sa ilang kahimtang nga gikan sa ordinaryong drivers ngadto na sa pagka-operator o stakeholder kon magtukod sila og kooperatiba? Gawas pa, nagka-moderno na ang atong panahon karon. (bobbygnalzaro@gmail.com)