NIASLOM og samot ang relasyon karon tali sa Pilipinas ug sa Estados Unidos human nga mipalabang og balaodnon ang United States Senate panel nga nagdili niadtong mga Philippine Government officials nga nalakip sa pagpapriso ni Senador Leila de Lima sa pagtaak sa Amerika.
Nitingkag karon ang dalunggan sa Palasyo kalabot ning maong balaora tungod kay alang kanila usa kini ka dakong pagpanghilabot sa US sa nasod kalabot sa mga legal nga proseso.
Sa niaging semana, ang US Senate committee mi-aprobar sa maong balaodnon nga gipasaka nila ni Senador Patrick Leahy ug Dick Durbin. Kini naghulagway nga ang pagkapriso ni De Lima gipaluyohan og usa ka pulitikanhong katuyoan.
Wa usab dayon mag-usik og panahon ang mga opisisyon sa paghangop sa maong kalambuan. Si Senator Risa Hontiveros ug ang Liberal Party uban sa Free Leila Movement mipadayag gilayon sa ilang suporta niini. Way pangalan nga gilakbit sa maong bill.
Pero salikwaot paminawon kining plano nila ni si Vicente Sotto III ug Christopher “Bong” Go kinsa posibling mopalabang usab sa Senado og susamang bill nga magdili nila ni Leahy ug Durbin sa pagsulod sa Pilipinas.
Kon mahinayon man gani ni, mahimong mabutang sa apiki nga sitwasyon ang Pilipinas kay kon nagtuo sila nga usa ka kalapasan ang gihimo sa US Senate nganong sundon man ni nila?
Samtang kasagaran sa atong mga Philippine officials adto sa US mobakasyon o maglulinghayaw, unsa man say anhion nila ni Leahy ug Durbin dinhi sa Pilipinas?
Ang angay unta buhaton ni Go ug Sotto ilang padalhan og petisyon o suwat ang US Senate aron pagpadayag sa ilang dakong pagsupak ug sa samang higayon nag-awhag sa pag-review sa maong balaodnon.
Dili makasulbad sa problema ang pagbawos-bawos.