NALIPAY kaayo si Bebot nga natuman na ang iyang pangandoy nga makahupot og tulumanon sa radyo. Wala siya magdahom nga hatagan og ‘break’ sa iyang manedyer human sa duha ka tuig niyang pag-alagad isip reporter. Tungod sa pagbiya sa magsisibya nga nagdala sa usa ka entertainment program sa matag alas 9:00 ngadto sa alas 10:00 sa gabii, siyay gipuli.
“Ikaw ang nahunahunaan kong ibutang sa maong tulumanon, Bot, mosugot ka ba?” matod ni Mr. Valencia, ang manedyer.
“Ngano gong dili, Sir?”
Mao kadto nga nagsugod dayon siya pagdumala sa maong programa nga giulohan og Awitan Ko Ikaw. Ubos sa maong tulumanon, manawat si Bebot og mga pagtimbaya (greetings) gikan sa mga tigpaminaw pinaagi sa linya sa telepuno o sa selpon diin mahimo kang manawag ug mo-teks.
Ako nga iyang silingan sa barangay Marigondon naibog kaayo sa naangkong kapalaran ni Bebot. Damgo man ugod usab nako nga mahimong anawonser sa radyo. Ugaling lang kay wala moduyog kanako ang kapalaran.
“Nindota nimo, Bay, uy, anawonser ka na man diay!” matod ko usa ka hapon nga nagkasultianay mi sa tindahan ni Charito.
“Puyra buyag, Bay Ronie. Gidungog gyud tawon ang akong pag-ampo!” mapasigarbuhon niyang tubag. “Mahimo kang mo-greet, Bay, sa imong mga minahal. Teks lang unya kay ako dayong basahon sa kahanginan.”
Sa pagpanglabay sa mga adlaw nagkadaghan ang mga tigpaminaw sa programa ni Bebot nga kadaghanan mga katabang sa panimalay. Wala man god silay lingaw samtang magkurikuri sa mga buluhaton sa balay. Ganahan kaayo silang manimbaya sa ilang mga paryente ug kahigalaan sa ilang probinsiya. Gani, tungod niini, nagtukod og fans club ang sibyaanan.
“Maayong gabii, Kuya,” matod sa usa pa ka caller nga babaye nga paraygon kaayog tingog.
“Maayong gabii, usab. Kinsa ni?” sukna ni Bebot.
“Si Annabelle Payot sa Talisay. Mo-greet unta ko sa amoa sa Camotes.”
“Sige, padayon lang sa imong mga greetings.”
Ingon niini ang kahimtang sa tulumanon ni Bebot magabii diin matag human sa pipila ka caller o texter pagpabuhagay sa ilang panimbaya, mopatugtog dayon siyag gugmahanong awit.
Apan luyo niini, adunay binuhat nga wala mahimuot sa pagka magsisibya ni Bebot. Ang iyang kapikas nga si Vilma. Abubhoan kaayo kini bisan kon tulo nay ilang anak. Kanunay kining mamati sa programa ni Bebot aron maniid.
Tuod man, usa niana ka gabii, nabatian ni Vilma nga adunay nanawag nga babaye nga miingon nga ipa-off the air lang ang ilang estorya. Dinhi misamot ang katahap ni Vilma. Naglungutlungot ang iyang kahiladman. “Karon ka nakong Bebota ka!” ni Vilma sa kaugalingon. Samtang si Bebot niadtong tungora nahuman na sa iyang programa. Misakay dayon siyag dyip padulong sa ilang dapit sa Lapu-Lapu ug pag-abot sa Poblacion misakay og traysikol nga mobiyahe sa ilang barangay. Paghimuntog sa traysikol sa eskina paingon sa ilang balay mikawas dayon siya human makahatag og plete. Nagtutaghoy pa si Bebot nga mipadayugdog paglakaw. Hapit na ang tungang gabii niadtong higayuna hinungdang nagmingaw na ang kabalayan nga iyang nalabyan.
Apan paghitangka sa magsisibya sa ilang tugkaran nakugang siya pagkamatikod nga wala nay hagdan ang taas-og-silong nilang balay. Mosangpit unta siya sa asawa apan wala na lang kay sayod siyang nasuko kini tungod niadtong caller nga mipa-off the air kaniya. Igo na lang siya sa pagpanghupaw ug pagpanaguto. (KATAPUSAN)