NAGKAHAYAG ang tinguha ni Eloy Poligrates nga makabalik og duwa sa Philippine Basketball Association (PBA) gumikan sa maayo niyang gipangkita duwa sa PBA D-League Foundation Cup ubos sa kampo sa Marinerong Pilipino (MP) Skippers.
Ang produkto sa Southwestern University (SWU-Phinma) Cobras mao ang kasamtangang nag-una sa listahan sa mga kandidato alang sa Conference MVP award sa D-League.
Si Poligrates, 31, kinsa lumad nga taga Camotes Island, Cebu, nagpagawas og wala’y paglubad nga maayong duwa gikan sa iyang pagkasulod sa Skippers.
Sulod sa walo ka mga duwa, si Poligrates nag-average og 21 puntos, 3.1 rebounds ug 3.0 assists, nga numero nga nangulo sa Skippers aron makasulod sa finals sa labing unang higayon.
Si Poligrates nakaposte sab og rekord sa D-League human siya nakapakatap og 67 puntos sa dominasyon sa Skippers batok sa iWalk, 141-97, niadtong Agusto 26. Ang 67 puntos ni Poligrates mao ang labing dako nga nahimo sa usa ka magduduwa sa D-League.
Lig-on man tuod nga kandidato si Poligrates alang sa MVP award apan posible pa siyang maapsan sa mga nagsunod kaniya nga sila si Joshua Fontanilla sa BRT Sumisip Basilan-St. Clare ug Rich Guinitaran sa Centro Escolar University.
Samtang sa laing bahin, ang laing produkto sa Cebu Schools Athletic Foundation, Inc. (Cesafi) nga si Rey Suerte nahimong usab sa ikaunom nga puwesto alang sa pagka most valuable player (MVP) awardee sa nagpadayon nga UAAP didto sa Kaulohan.
Si Suerte, kanhi sakop sa University of the Visayas (UV) Green Lancers ug two-time Cesafi MVP, adunay 61.5 statistical points diin nag-average siya og 17.4 points, 7.7 rebounds, 4.1 assists ug 0.6 blocks aron pangulohan ang University of the East Red Warriors human sa first round sa elimination.
Sa kasamtangan, ang Warriors adunay 2-5 nga baraha.
Nag-una sa MVP race mao si Soulemane Chabi Yo sa University of Santo Tomas ug Angelo Kouame sa Ateneo de Manila University nga may 82.71 ug 81.43 SP matag usa.
Ang mikompleto sa top five mao sila si Bright Akhuetie sa UP, Kobe Paras sa UP ug Alex Diakhite sa UE. (ESL)