MGA duwa karon
5:15 pm- USPF batok DBTC (High School)
6:45 pm- USPF batok UV (College)
Protektahan sa defending champions University of the Visayas (UV) Green Lancers ang ilang paggunit sa solong liderato sa ilang pagpakigbatok sa nagkakuyaw nga University of Southern Philippines Foundation (USPF) Panthers sa main game karong gabii sa Cebu Schools Athletic Foundation Inc. (CESAFI) basketball college division sa Cebu Coliseum.
Ang Green Lancers, nga nagtinguha og four-peat ning tuiga, kasamtangang nag-una dala ang 4-1 nga rekord.
Human sa makapaigking nilang kapildihan batok sa University of Cebu (UC) Webmasters niadtong Septiyembre 15, ang Green Lancers ni coach Gary Cortes nagbangis sa nagsunod nilang tulo ka mga tahas.
Bitbit ang sakit sa ilang kapildihan batok sa Webmasters, ang Green Lancers namungot ngadto sa Cebu Insititute of Technology University (CITU) Wildcats, 105-65, University of San Jose Recoletos (USJ-R) Jaguars, 76-56, ug Southwestern University (SWU-Phinma) Cobras, 71-66.
Sa ilang bahin, ang Panthers, nga adunay 3-2 nga rekord, mokombati nga adunay taas nga moral gumikan kay gikan sab kini sa duha ka sunodsunod nga kadaugan batok sa CITU, 79-66, ug USJ-R, 78-69.
Hinuon bisan unsa ka taas ang moral sa Panthers, dili ikalimod nga inilog gihapon ang Green Lancers ning sangkaa.
Apan kon molugak og gamay ang Green Lancers, hayan dili layo ang posibilidad nga mapahimuslan kini sa Panthers aron pagposte og surpresang kadaugan.
Sama sa naandan, ang Green Lancers magsalig og maayo nila ni import Coulibaly, Lassina, Gileant Delator, Michael Maestre, Jancork Cabahug, Sheldon Gahi ug Froiland Maglasang.
Ang Panthers mosandig og maayo sa impresibo nilang import nga si Sameem Swint, Lyndon Colina, Rodelio Cauba ug Al-je Mendez.
Sa premirong duwa, makigsangka ang USPF Baby Panthers sa Don Bosco Technological Center (DBTC) Greywolves alang sa high school division.
Ang duha ka mga kampo natanggong sa three-way tie sa 3-2 nga rekord kauban ang Cebu Eastern College (CEC) Dragons. (ESL)