TUKION sa mga sakop sa Hunta probinsyal ang pag-umol sa mga guidelines sa bag-ong scholarship grant gikan sa lalawigan sa Sugbo.
Niadtong Miyerkules Septiyembre 25, 2019 atol sa Provincial School Board meeting, gisugyot ni Bokal Christopher Baricuatro ang pagbukas sa bag-ong scholarship grant nga nganlan og CP-Gifts o Cebu Provincial Grants Intended for Tertiary Students pinaagi sa usa ka ordinansahon.
Tumong sa ordinansahon nga usahon ang tanang scholarship grants sa Probinsya sa Sugbo aron mas hapsay ug epiktibo. Kon kini maaprubahan, makapahimos niini ang mga aplikante nga indigent, apan may katakos. Buot pasabot may mga taas og grado.
Matag distrito may 100 ka mga tinun-ang dawaton ug mahatagan og scholarship.
Kon dili makakompleto ang usa ka distrito sa 100, mamahimong ihatag ang ubang slots sa laing distrito. Dako og kahigayonan ang mga aplikante nga mokuha sa kursong Agriculture, Accountancy, Real Estate Management,Engineering, Mechatronics o Robotics ug uban pang Information Technology o computer related nga kurso.
Pipila sa mga rekisitos aron maka-avail niini mao ang 85% nga general average sa aplikante, kinahanaglan nga kapin sa usa ka tuig na nga residente sa lalawigan ug kinahanglan usab nga dili molabaw sa P200,000 ang income sa iyang pamilya matag tuig. (ANV)