PARANG, Maguindanao -- Grabe ang kahimtang sa 61-anyos nga lolo human nga maabtan sa live nga kuryente ang iyang opaw nga ulo samtang gilangkat ang atop sa ilang balay.
Nahitabo ang insidente alas 4:55 sa hapon niadtong Dominggo.
Ang biktima nailhan nga si Danilo Bareto Sarillana, minyo, nagpuyo sa Barangay Making sa nahisgutang lungsod.
Sa taho gikan sa Parang Municipal Police Station, nasayran nga gilangkat sa lolo ang atop sa iyang balay kay nilapas na kini sa kalsada atol sa gilusad nga katapusang adlaw sa road clearing operation sa dapit.
Apan aksidente nga misangit ang opaw nga ulo ni lolo sa live wire sa Maguindanao Eletric Cooperative ug nakuryentihan.
Tungod sa kakusog sa boltahe sa kuryente, nahulog ang biktima gikan sa atop sa iyang balay.
Gitabang ang biktima sa iyang pamilya ug gidala ngadto sa Parang District Hospital apan gibalhin dayon ngadto sa Cotabato Regional and Medical Center sa Cotabato City.
Sa pagsuwat ning balita, anaa sa grabeng kahimtang ang biktima nga nakaangkon og grabeng sunog ug bali sa lawas kinsa padayong gitambalan. (Edgar E. Fuerzas)