MALITA, Davao Occidental -- Way natalang damyos, way kinabuhing nakalas ug naangol atol sa magnitude 6.4 nga linog (unang gitaho nga 6.1) nga nitay-og sa lungsod sa Jose Abad Santos niadtong Dominggo sa buntag, Septyembre 29.
Apan, sumala sa Provincial Disaster Risk Reduction and Management Council (PDRRMC) nga gi-alerto nila ang tanang Municipal DRRMC sa lima ka mga lungsod sa probinsiya.
Gibutyag ni Harry Camoro, PDDRMC action officer, nga aduna nay mga nabantayang minor cracks sa mga niaging linog ang pipila ka mga tunghaan nga habog.
Sumala ni Camoro nga ila sab giabisohan ang publiko nga mag-amping kanunay sanglit di matagna ang linog nga matag karon ug unya mahimong mahitabo.
Sa Jose Abad Santos, diin natala ang epicenter sa kusog nga linog, gitataw ni Mayor John Jason Joyce nga nihimo na ang ilang MDRRMC og "aggressive monitoring" sa 26 ka mga barangay.
Giklaro hinuon sa mayor nga way bisan usa ka pamilyang naapektuhan niini.
Samtang adlaw'ng Dominggo, Septyembre 29, nakatala ang Philippine Institute of Volcanology and Seismology (PhiVocs) og 95 ka mga aftershocks gikan magnitude 2 hangtud magnitude 3.5.
Subling nakatala ang PhiVocs og magnitude 5.3 nga linog alas 3:40 sa hapon niadtong adlawa, diin ang epicenter anaa sa 123 kilometros gikan sa habagatang sidlakan sa Jose Abad Santos ug adunay gilawmon nga 58 kilometros.
Banda alas 8:38 Lunes sa buntag, Septyembre 30, nakasinati sab og magnitude 2.8 nga linog ang maong lungsod, diin natala ang epicenter mga 152 kilometros gikan sa habagatang sidlakan sa lugar ug adunay 30 kilometros nga gilawmon.
Gumikan niini, giawhag sa lokal nga gobyerno ang ilang mga molupyo nga mag-amping sa kanunay. (Orlando B. Dinoy)