SUPERBALITA CAGAYAN DE ORO

Todiño: Kwalipikasyon sa pagka-pulis

Pro Bono

NANGITA ang gobiyerno og 10,000 ka mga pulis. Hulipan nila kadtong mga badlongon nga nalambigit sa nagkadaiyang salaod.

Si Interior Secretary Eduardo Año niingon ilang pilion kadto lamang ligdong nga mga aplikanti pagka-pulis.

Dako kining hagit sa gobiyerno. Gitahasan ni Año ang PNP ug ang Napolcom sa pag-hire niadtong kwalipikado nga motamud sa ilang panginahanglan.

Usa sa labing dako nga kwalipikasiyon mao kining morally upright – nagpasabot ligdong ang iyang pagkatawo.

Mas maayo idugang sa PNP kining sugyot sa kwalipikasiyon. Kinahanglan ang aplikanti way bisyo – dili nanigarilyo, dili manugal, dili moinom, ug labaw sa tanan mahinadlokon sa Ginoo.

Naa pay daghan tawo nga dunay taras nga ingon niini. Apan, lisod sila pangitaon.

Nganong kinahanglan man sa usa ka pulis nga way bisyo? Suma gud, panid-i sa imong palibot kon kinsa tong dunay mga bisyo, pulis man o dili, molikoy gyud ilang pagkatawo.

Duna man hinuoy mga pamaagi nga makakuha gyud og kwalipikado ang PNP. Dili man perpekto ang tawo apan dunay higayon sa pagbag-o niini.

Bisan kanang anaa na sa PNP apan badlongon gihapon, mahimo pa sila nga mausab. Insaktong programa sa maayong paggiya lang ang gikinahanglan.

Kon sobsob ang paghatag nato og mensahi sa maayong gawi bisan unsa katig-a sa kasingkasing mausab baya na.

Ang kuwang gyud karon mao kining paghatag og higayon sa pagpasantop sa pulong sa Dios. Kon himuon kanunay sud sa PNP kining devotional matag adlaw, pagtuon sa pulong sa Dios bisan 30 ka minuto lang, dako gyud og kausaban nga makita diha sa kampo sa kapolisan ug mismo diha sa matag sakop sa PNP.

Kon magpaduol ka kanunay sa Ginoo, maestablisar nimo ang maayong relasiyon ngadto kaniya, di kana ganahan mohimo og binuang kay maikog ug maulaw kana sa Ginoo.

Apan, kon kuwang ta og mensahi gikan sa langit, wala tay relasiyon ngadto sa Dios, magbuot ra ta sa atong himuon nga makatagbaw sa atong kaugalingon. Hinungdan nga dili malikayan kining mga binuang ug salaod sa atong palibot.

Dakong deperensiya gyud kon ang aplikanti dili maka-Dios kon itandi niadto kanunay dikit sa Dios.

Kining kwalipikasiyon sa pagka-ligdong nga tawo, mas labaw pa na sa kahibalo ug kasinatian sa usa ka aplikanti. Mag-una man kon hanas ka sa trabaho apan kwesiyonabli imong pagkatawo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph