PATAY diha dayon ang 59 anyos nga lalaki human nga gitabangan og tigbas ug gidunggab sa magsuon diha sa Calaanan, Barangay Canitoan ning siyudad sa Cagayan de Oro.
Giila ang biktima nga mao si Rolly A. Sabaldana, 49, ulitawo, residente sa dapit.
Sa inisyal nga imbestigasyon sa Police Station 7 (PS7) sa Bulua sa pagpangulo ni Police Captain Jason Sto. Domingo nga kining biktima giiingong nanulong sa balay sa iyang brother in law nga giilang si Ricardo Laroa.
Giingong sa walay igong rason kalit lang niini nga gikulata hinungdan nga ang iyang mga anak niini nga mao sila si Raffy ug Anthony ang nagsige og badlong niini apan giingong dili kini gapabadlong ug padayon sa pagkulata sa ilang amahan.
Tungod sa giingong kalagot ni Raffy ug Anthony sa gihimo niini sa ilang amahan mikuha kini og kutsilyo si Raffy ug giluba sa liog si Rolly samtang mikuha sab og atsa si Anthony ug gitigbas kini maoy hinugdan sa kamatayon sa biktima.
Naabtan sa kapolisan si Rolly nga naligo sa iyang kaugalingong dugo atubangan sa balay sa iyang bayaw.
Wala nasab naabtan sa kapolisan ang duha ka magsuon nga giingong misibat human sa hitabo.