TOTAL ban na ang mga produktong baboy sa Misamis Oriental ug Cagayan de Oro City tungod sa kabalaka nga makasulod ang African Swine Fever (ASF).
Gibutyag ni Misamis Oriental Provincial Veterinary Officer Benjamin Resma nga ilang sigurohon nga dili motakod sa tawo ang sakit sa baboy.
"Rest assured nga kini nga ang African swine fever nga sakit dili makatakod sa tao apan ngadto lamang sa baboy," matud ni Resma.
Gipahibalo niini nga niadtong Septiyembre 26, 2019 nagpagawas og Executive Order No. 2014-19 si Misamis Oriental Governor Bambi Emano sa pag total ban sa tanang prudoktong baboy lakip na niini pork in can, longganisa, chorizo ug uban pa nga ginama gikan sa baboy nga nagikan sa Luzon.
Rason niini nga dili na makontrolar ug mahibaloan kon asa nagikan ang mga prudokto ug aduna nay pipila ka mga kaso sa sa ASF nagkalain -laing dapit sa kaulohan.
Gikabalaka ni Emano nga basin unya mataptan sa maong sakit ang mga baboy dinhi sa lalawigan nga usa sa swine supplier sa nasod.
Kung kaniadto ang mga prudokto lamang gikan sa probinsya sa Bulacan ug Rizal ang gidili sa lalawigan apan karon ang prudokto nga nagikan gyud sa Luzon area ang gidili na makasulod sa Misamis Oriental.
Gimando niini ang Task Force ASF nga bantayan ug respondihan ang mga reklamo sa katawhan kalabot sa ilang binuhing baboy.
Nagpadala na usab kini og sulat ngadto sa kadagkoan sa airport, seaport sa lalawigan nga dili pasudlon ang maong mga produkto nagikan sa kaulohan.
Hinuon gipasabot ni Resma nga luwas kaunon ang karneng baboy nga nagikan dinhi sa probinsya ug walay angayan nga ikabalaka ang katawhan.
Ning bag-o nagpagawas sab og kamandoan si Cagayan de Oro City Mayor Oscar Moreno sa temporaryong pag-ban sa mga prudoktong baboy gikan gihapon sa kaulohan.