DUHA ka mga babaye ang namatay samtang 20 ka mga pasahero ang samaran human mibalitok ang bus nga ilang gisakyan niadtong Sabado, Septiyembre 28, mga alas 2:15 sa hapon sa Sayre Highway, Sitio Bagong Silang, Impalutao, Impasug-ong, Bukidnon.
Naipit sa bus sila si Marisol E. Marinay, taga Poblacion, Impasug-ong, ug usa ka Mary Joy B. Tubay, 20, dalaga, taga Cawayan susamang lungsod kinsa pulos gideklarang dead on arrival sa Bethel Baptist Hospital.
Ang bus usa ka kolor pula nga King Long sa Rural Transit Mindanao Incorporated nga nagdala sa plaka nga NAB 9471 gimaneho ni Leomerne G. Velarde, 41, minyo, taga Poblacion, Medina, Misamis Oriental.
Sa inisyal nga imbestigasyon sa Impasug-ong Police Station nasuta nga samtang nagdagan ang sakyanan paingon sa norte nga direksyon sakay ang 38 ka mga pasahero lakip na ang driver ug tour attendant usa ka van nga nakauna sa bus ang kalit nga nag-brake hinungdan nga paspas sab nga nag-brake ang bus apan nawad-an kini og kontrol dihang mi-zigzag kini sa kilid nga bahin sa dalan.
Tungod kay ulan ulan ug danlog niadtong tungora wala na makontrolar sa driver maoy hinungdan nabalitok ang bus ug mas nagrabehan dihang naipit ang duha ka mga biktima.
Gumikan niini mokabat 20 ang samaran nga mao sila si Doreen Toong, 32; Jovanie Enomar, 46; Magdalena Enoma, 42; Nichile Monsanto, 16; Rhea Moreno, 28; John Paul Namalata, 13; Lira Namalata, 39; Rodil Liloc, 42; Yprileyn Namalata, 20; Crezerinah Okit, 18; Eden Riguer, 61; Floramay Riguer, 25; Jane Riguer, 30; Princess Athena, 9; Baby Jane Sal-ahan, 28; Liezel Jane Salva, 28; Maria Shaira Mae Serad, 19; Arnold Silmaro, 32; Jemuel Silmaro, 38; ug Ellyvin Silmaro, 62.
Ang driver gikostudya na karon sa kapolisan samtang management sa bus nipasalig og ayuda ngadto sa mga biktima lakip sa mga namatay.