NIKABAT og 104 kilos nga meat products gisunog sa Environmental Management Bureau (EMB-DENR) sa Barangay Umapad, siyudad sa Mandaue kagahapon sa buntag.
Mao kini pipila lang sa lakang nga sangputan sa mga produkto nga misulod gawas sa Sugbo.
Gisunog pinaagi sa pugon sa Environmental Management Bureau (EMB), Department of Environment and Natural Resources (DENR), Barangay Umapad sa dakbayan sa Mandaue.
Ang 104 kilos nga lainlaing pork ug meat products nga nasakmit gikan sa mga siyudad ug kalungsuran sa probinsya sa sugbo.
Lakip sa gipaagi sa thermal destruction sa EMB-7 mao ang mga chorizo, skinless, mga linata, kinilo nga lechon, adobo ug ubang pagkaon nga nasakmit ug gisurender sa mga gagmay’ng tindahan ug sa mga tawo nga misud ug migawas sa Sugbo.
Ang hepe sa Animal Health Division sa Provincial Veterinary Office, Dr. Mary Ann Gabona miingon nga giestrikto na sa probinsya ang pagsud ug paggawas sa mga buhi ug karneng baboy sa sugbo.
Hinuon, matud ni Dr. Gabona nga ginagmay nalang ang ilang nasakmit kay lisud naman ang pagpalusot sa pantalan tungod sa gipakatap nga mga sakop sa African Swine Fever Task Force sa mga lokal nga kagamhanan.
Gani, kadtong manglitsonay nga mangumpra og mga baboy kinahanglan nga mosunod sa mga rekisitos sama sa veterinary health certificate, disinfection certificate ug farm registration gikan sa Bureau of Animal Industry (BAI) ingon man ang rehistro sa sakyanan nga kargahan.
Lakip sa giestrikto ang pagparehistro sa backyard hog raisers ngadto sa Provincial Veterinary Office (PVO).
Ang giisip nga backyard raisers mao kadtong dunay mga buhi nga di molapas sa 21 ka dagkong baboy o kaha di molapas sa 41 ka baktin. (ANV)