IKANSELAR o bawion sa Department of Transportation (DOTr) pinaagi sa Land Transportation Franchising and Regulagory Board (LTFRB) ang mga prangkisa sa mga operator nga magmagahi sa pagmoderno sa ilang mga public utility vehicle (PUV) inig abot sa Hunyo 2020.
Kini maoy gipadayag ni DOTr Undersecretary Mark de Leon atol sa pagpakighinabi sa Superbalita Cebu human sa gipahigayon nga nationwide strike sa grupong Pinagkaisang Samahan ng mga Tsuper at Operator Nationwide (Piston) ug Alliance of Concerned Transport Organizations (Acto) Piston kagahapon, Lunes, Septiyembre 30.
Si De Leon kinsa nadestino sa Road Transport nibutyag nga i-raffle ang mga prangkisa sa operator ug matugyan ngadto sa mga operator kinsa gusto nga mobag-o sa ilang mga unit aron makabiyahe sa ilang rota.
“When 2020 comes, kung ayaw nilang mag-modernize so we want to be held hostage against these people who don’t want to provide good public service, ayaw natin niyan. We should hear the commuters. The commuters should be given a public transport that they deserve,” padayag ni De Leon.
Si De Leon nga niingon nga wala magkuwang ang gobiyerno pagpahibawo sa mga PUJ operator ug aduna pay programa ang gobiyerno para matabangan ang ilang sektor sa pagtuman sa programa ni Presidente Rodrigo Duterte.
Ang gipasabot sa Usec. for Road Transport mao ang finacing program sa gobiyerno nga gitawag og 5-6-7-8.
Kini nagpasabot nga 5% downpayment sa mga bag-ong jeepney nga adunay 6 % nga interest ug ilang impason sulod sa 7 ka tuig ug aduna pa silay P80,000 nga fuel subsidy matag tuig.
Si De Leon nagkanayon nga pabor kaayo kini sa mga operator sanglit kon adto sila sa private financing, ang down payment dili moubos sa 20% ug ang interest maobot sa 12% ug impason sulod sa 5 ka tuig ug ubang pang programa.
Dugang niya nga gihatagan og tulo ka tuig ang mga operator sa pagbag-o sa ilang mga units.
Way dayalogo
Gitug-an ni Greg Perez, pangulo sa Piston sa Cebu nagkanayon nga nipahigayo lang sila og progaram atubangan sa buhatan sa LTFRB VII ug wala sila makahinabi ni RD Eduardo Montealto para unta mapaabot ang ilang tuyo.
Matod pa ni Perez nga kinsa niingon nga dili sila supak sa modernisasyon apan dili sila mopalit og bag-o kay ilang gihulagway nga dili sila maka-afford sa kapin o kulang P2 milyones nga bag-ong Beep.
Gusto nila nga ayuhon lang ang mga guba sa mga PUJ nga nagdagan karon ug iya pa nga gibasol ang LTFRB nga wala maka-monitor sanglit gitugotan gihapon nga makabiyahe bisan aduna nay daghang depekto gumikan sa iyang giingong korapsyon.
Welga way epek
Gihulagway ni Konsehal Dave Tumulak kinsa maoy gitahasan ni Mayor Edgardo Labella pagmonitor sa welga niingon walay epekto sa transportasyon ang gihimo sa Piston gani wala makadagan ang 30 ka bus nga ilang giandam sanglit namiyahe ang mga PUJ ug sama sa naandan ang ilang nasinati mao ang problema sa trapiko.
Apan sa dakbayan sa Mandaue, nag-deploy og 10 ka mga bus alang sa mga susakay nga na-stranded sa welga.
Sama ni Mandaue City Mayor Secretary, Atty. Eddu Ybañez nga atol sa ilang pagmonitor sa kadalanan sa Mandaue wala silay nakita nga adunay mga naapektuhan sa maong strike.
Upat ka buses ang gi-standby sa Mandaue plaza duol sa parking building.
Sigon ni Ybañez nga adunay pribadong kompanya nga niboluntaryo sab nga magpahuwam bus para sa mga og unom ka mga.
Piston mibahad
Nibahad og ilang kaugalingon nga transport strike ang Piston Cebu Chapter.
Kon hangtud sa sunod tuig di gihapon dunggon ang ilang panawagan kalabot sa ilang pagkwestyon pag-phase out sa mga PUJ.
Apan normal ra ang dagan sa transportasyon sa Metro Cebu, ug walay mga PUJ driver ang namiya sa ilang mga PUJ, sa gihimo unta nga nationwide transport strike nga gipanguluhan sa Piston ug Acto didto sa kauluhan.
Gani wala ray nadawat nga mga reklamo ang mgalokal nga kagamhanan sa mga pasahero nga na-stranded.
Ang ubang pasahero ang nalangay tungod gihapon sa paghuot sa trapiko.
Hinuon kini ang giklaro na daan ni Greg Perez ang pangulo sa Piston Cebu chapter, nga wala silay plano nga moparalisa sa transportasyon sa Sugbo ning pagpahigayon sa nationwide transport strike.
Kundi igo lang sila nihimo og pagsabasaba ug martsa-rally, sa atubangan sa buhatan sa LTFRB-7, dayon nitapos sa ilang programa diha sa tungatunga sa dan Colon.
Apan bahad sa ilang grupo nga padayon sila mohimo og mga binuwan nga pag-rally, mga pagsabasaba.
Ug kon hangtud sa sayo sunod tuig dili dunggon sa gobyerno, hayan nga sila dinhi sa Sugbo molusad og transport strike.
Giklaro ni Perez nga wala silay supak sa modernisasyon, apan ilang gikwestiyon ang pamaagi nga susama na og negusyo.
Sa rally nisalmot usab ang mga sakop sa urban poor group, mga vendor ug pipila sa kabataan. (Dugang taho nila ni FMD, ANV)