ANG taga Department of the Interior and Local Government pulos nakadayeg sa mga Siyudad sa Sugbo ug Mandaue sa ilang paghawan sa nag-unang mga karsada atol sa inspection sa Lunes, Septiyembre 30, 2019.
Nakadayeg si DILG Undersecretary Epimaco Densing III sa road clearing sa Cebu City Government sa nanag-unang karsada sa dakbayan atol sa ilang inspection sa Lunes.
Si Densing, kuyog ni Mayor Edgardo Labella inabagan sa Cebu City Police Office ug Bureau of Jail Management and Penology, nilibot sa downtown area aron pagsusi kon nisunod ba si Labella sa mando ni Presidente Rodrigo Duterte.
“Based on what I saw, more or less they have been doing their job. I have gone to Osmeña Boulevard, Colon Street in which for more than five decades, they have been an eyesore because of the ambulant vendors,” matod ni Densing.
“For the first time in my life, I saw Colon and Osmeña Boulevard free of any obstruction especially on the sidewalks. If you look at it, people can now walk on the sidewalks without going to the streets. Nalimpyo gyud ni Mayor (Labella) and mga area na ito,” dugang ni Densing.
Human sa downtown area, sila si Densing niadto sa Kaohsiung Street sa North Reclamation Area duol sa SM City Cebu tupad sa Mahiga Creek. Kini nga dapit kanhi gihugopan sa mga food vendor diin ang mga taxi, PUJ ug ubang de pasaheroan ug private vehicles adto mokaon ug maoy nakapasamot kahuot sa trapiko.
Apan nalimpyohan kini ni Labella ubos sa pagpangulo ni Raquel Bohol-Arce sa Prevention Restoration Order Beautification Enhancement.
Gipahimutang
Si Labella, sa iyang bahin, nagkanayon nga gipahimutang ang mga vendor nga apektado sa duol sa Tabo sa Banay duol sa Super Metro ug ubang lugar nga di makabalda sa dagan sa mga sakyanan.
Ang mayor nagkanayon nga magsilbi kining hagit sa iyang pagdumala sa siyudad.
Siya niingon nga mahimo kini sa City Government uban sa ayuda sa mga tawo nga di moabuso.
Gipadayag ni Densing nga sa mosunod nga tulo ka adlaw, adunay grupo nga giumol sa DILG para maoy mo-assess sa matag LGU kon nituman ba sila sa mando sa Presidente.
Ang mga mayor o gobernador sa highly urbanized city nga walay gihimo sa mando ni Duterte maoy morekomenda ngadto sa Office of the President pagsuspenso nga adunay gidugayan nga duha ngadto sa 12 ka buwan.
Si Densing nidugang nga pangayoan usab nila og programa ang barangay.
Sa higayon nga malimpyo na sa siyudad ang area, katungdanan na sa barangay diin nahisakop ang lugar sa pagmintinar sa kalimpyuhon sa dapit.
Malipayon sa resulta si DILG Mandaue City Director Jhoaden Lucero sa inspection sa clearing operation usab sa Dakbayan.
Gipangulohan ang inspeksyon ni Densing ug suma pa niya nga ang kasagarang mga dalan ug sidewalk nga ilang nasuroyan limpyo na.
Apan, sigon niya aduna gihapoy mga dalan nga wa pa nalimpyohan labi na sa U.N. Avenue kay aduna gihapoy makit-an nga mga sidewalk vendor.
Nakita sab ni Densing ang kahago sa mga opisyal sa Mandaue labi na sa paghawan sa dalan sa B.Ceniza St.
Sa una usa ra ka lane ang maagian tungod sa kadaghang mga sidewalk vendors, apan karon maagian na ang duha ngadto sa tulo ka lanes.
“If the local chief executives and the barangay officials will really have the political will to do what they are mandated to do under the law, kaya nilang gawin,” sigon ni Densing.
Positibo sab si Densing nga sulod sa pipila ka semana mahawan ra sa mga opisyales sa Mandaue ang mga dalan nga wa pa malimpyuhi.
Nanghinaot siya nga masustener kini ang kalimpyo sa maong dakbayan.
Sa ilang bahin, ang DILG-Mandaue CIty nisaad nga ilang balikon ang mga dalan ug sidewalks nga di pa hawan.
Ila kining limpyohan og balik sa di pa ang final nga inspeksyon nga karong Huwebes, Oktubre 3.