UNSA may imong mensahe sa mga batan-on sa di pa nako tapuson akong programa karong adlawa?” matod ni Kuya Charlie, komenteytor sa DYKK, ngadto kang Roger Gaquit, pinasidunggang dinapit ning sayong kahapunon. Daghang tigpaminaw ning programaha sa Kabisay-an ug Mindanao, nga giulohan og ‘Kamaong Mosulod, Kamaong Mogawas.’ Naghatag og pagtulon-an sa tawo sa tanang matang sa problema. Ang gihisgutan karon mao ang pagka adik ni Roger sa drugas.
Mihangad si Roger nga naglingkod sa atubangan ni Kuya Charlie sa sulod ning bugnawng estudyo sa radyo. Gitigom niya ang iyang hunahuna aron makumbinser niya ang mga naminaw. Trayintay singko na ang iyang edad. Duna na siyay tulo ka anak. Wa siyay klarong trabaho, apan may makolekta nga abang sa upat ka lawak sa iyang balay nga giabangan og mga ‘bed spacers.’ Si Chona nga iyang kapikas ug kanhi klasmeyt niya sa ‘pot session’ nag-ahente sa yuta ug mga alahas. Unang mibiya sa bisyo si Chona tungod ug alang sa mga anak.
Kinse anyos pa si Roger nga misugod sa bisyo. Nabukbokan siya usahay sa iyang maguwang nga si Rudy kon manimahong marijuana ang iyang gininhawa. Tungod sa iyang bisyo wa siyay nahumang kurso. Tulo ang nasugdan ug galgal sa mga barkada ang hinungdan nga way nahuman. Nahimo siyang kawatan sa mga butang sa iyang ginikanan ug mga igsuon. Nakapangawat sab siya sa iyang mga higala. Kaduha na siya nasulod sa mental hospital tungod kay na-praning. Kaduha sab siya madakpi sa PDEA. Apan kay ‘user’ ra man siya, wa siya estriktoha. Kini tungod sab sa koneksiyon sa iyang amahan nga naa sa gobiyerno mag-alagad. Tungod sa iyang bisyo nangamatay ang iyang ginikanan og sayo tungod sa konsumisyon. Gikasilagan na siya sa iyang mga igsuon.
Bisan og wa siya makaagi og ‘rehab’, nakabiya si Roger sa pagka adik, tungod sa iyang mga anak nga mga tin-edyer na. Si Dante 16; si Paul 14; ug si Faith 12. Di siya gustong mokupya ang iyang mga anak sa bisyo sa ilang ginikanan. Gihimo niyang inspirasyon sa pagbag-o ang iyang mga anak kay hait og mga salabutan. Gisuklan niya ang iyang pagka adik. Usa ka tuig na siyang limpiyo sa drugas. Ug hugot ang iyang panaad nga dili na gayud mobalik pa sa maong bisyo. Hasta ang inom ug panigarilyo iyang gibiyaan.
Mitan-aw si Roger kang Kuya Charlie nga naghuwat sa iyang tubag sa pangutana niini.
“Una sa tanan, kining drugas makadaot gayud. Kita ray gitunto sa mga druglord nga protektado sa mga pulitiko. Ang atong garbo ra gayud maoy nagtukmod nato nga motilaw kay kuno di ta maunsa. Kamong nakatilaw na, biya dayon samtang wa pa ma-adik. Kamong wa pa katilaw, ayaw na pagtilaw. Panid-i ang nakatilaw: kabuang, kamatayon o karsel ang resulta. Sayon ra ang pagtumba ining negusyo sa drugas. Hinuktokan lang ang ‘law of supply and demand.’ Wad-a ninyo ang ‘demand’, mahanaw sab ang ‘supply.’ Kamong mga ginikanan, isilsil kini sa alimpatakan sa inyong mga anak. Kamong way ginikanan nga nagmatuto, higugmaa ug kaluy-a ang inyong kaugalingon. Dili na mo angay makasinati og kadaot. Nakita na ninyo sa ubang mga tawo ang kadaot nga nahimo sa drugas. Wad-a ninyo ang ‘demand’, aron mawala sab ang ‘supply.’ “Kini maoy gipamulong ni Roger nga naggunit sa mikropuno.
Si Kuya Charlie mitutok pag-ayo kang Roger samtang nagpahiyom. Mitindog siya ug sipa nga mipakpak sa makadaghan. Miduol siya kang Roger ug hugot nga migakos niini.
Natandog ang pagbati sa komenteytor sa gipamulong sa iyang dinapit. Nakasulod si Roger sa bisyo sa drugas, apan nakamao kining nakagawas sa maong bisyo. (KATAPUSAN)