SUSMARIOSEP. Naunsa na man ni karon nga naapil man si PNP Chief Oscar Albayalde sa gitawag og “ninja cops” o kadtong mga miyembro sa kapulisan nga nagnegosyo o nakakwarta sa mga druga nga nadakpan sa kapulisan?
Mao kini ang gisulti ni kanhi CIDG chief Benjamin Magalong nga karon mao na ang mayor sa Baguio City.
Matod pa, nahitabo ang maong eskandalo sa dihang PNP provincial director pa si Albayalde sa Pampanga.
•••
Matod pa, ang nadakpan sa kapolisan ubos sa pamunoan ni Albayalde mikabat sa 200 ka kilo nga shabu pero ang gi-report kay 38 kilos ra ang nadakpan.
Buot ipasabot, nawagtang ang balor og 162 ka kilos nga shabu nga nagkantidad og P648 ka milyon ka pesos. Asa paingon ang maong kwarta?
Misulti si Magalong nga mimando si kanhi PNP Chief Alan Purisima nga ipaimbestigar ang maong kaso sa dihang iyang nadawat ang balita nga pipila ka mga sakop sa intelligence group sa PNP provincial command sa Pampanga ubos sa kamandoan ni Albayalde nakapalit og mga bag-o nga sports utility vehicles (SUV).
Dis-a gikan ang maong kwarta nga gipalit sa mga SUV?
May kalabotan ba ang nawagtang nga shabu nga balor og 648 ka milyon ka pesos sa kwarta nga gipamalit og mga service utility vehicles (SUV) sa mga sakop sa intelligence group sa PNP Pampanga?
•••
Pastilan paita og tinuod kining maong balita.
Unsaon pagka-solbad sa problema sa druga kon mismo ang kapolisan miapil na sa maong kalihokan?
Ug ang pinaka-importante sa tanan, unsaon pagka-solbad ang problema sa druga sa atong nasod kon mismo ang usa ka opisyal nga mao na karon ang nangulo sa PNP sa tibuok nasod naapil man sa eskandalo sa gitawag og “ninja cops?”
•••
Ug dili kay kana lang, midugang pa si Magalong.
Gibuhian pa gyod sa PNP sa Pampanga ang suspetsado nga si Johnson Lee nga matod pa, mibayad og 50 ka milyon ka pesos alang sa iyang kagawasan.
Tinuod ba kini?
Unsay kalabotan ni Albayalde sa maong eskandalo?
•••
Bantog rang kalit lang nga gikuhaan sa iyang mga police escorts si PDEA chief Aaron Aquino sa dihang mipagawas si Aquino sa gitawag og “ninja cops.
Sama sa giinitan o gipaningot si Albayalde sa maong eskandalo, labi na gayod kay duna man diay siyay kalabotan, matod pa, kaniadtong panahon nga siya pa ang Provincial Director sa PNP Pampanga.
Unsa kaha ang buhaton ni PRRD ngadto ni Albayalde karon nga giapil man siya ni Magalong sa maong eskandalo?
Labanan ba niya kini o palagpoton sa serbisyo?
Nindot tutokan nato kining maong drama.
Abangan.