MAKABILIB ka kon makasuroy karon sa makasaysayanong dan Colon, ang labing karaang sentro sa pamatigayon sa Sugbo o nasod sukad sa panahon sa mga kolonyalistang Espanol. Sa mga lumad ug dugay nang nanimuyo dinhi, makaingon gyud nga “wow, limpiyo na.” Way nagkayamukat nga mamaligyaay sa sidewalk. Hamugway na ang paglakaw.
Resulta kini sa political will, walay imposible ang kausaban. Apan ang nagtukmod nga political will dili gikan sa lokal nga liderato, nagsumikad mismo kang Presidente Rodrigo Duterte nga nimando sa paghawan sa tanang babag sa kadalan ug sidewalks. Ang 60-ka-adlaw nga lugway napupos niadtong Dominggo, Septiyembre 2.
Niadtong Lunes, Septiyembre 30, ang mga tinugyanan sa Department of the Interior and Local Government (DILG) ubos sa pagpangulo ni Undersecretary Epimaco Densing III ningsusi ug nakadayeg sa mga siyudad sa Sugbo ug Mandaue sa ilang paghawan sa nanag-unang karsada.
Gipadayag ni Densing nga adunay grupo nga giumol sa DILG para mo-assess sa matag LGU kon nituman ba sa mando sa Presidente. Ang maong grupo maoy morekomendar og suspensiyon batok sa mga mayor o gobernador way gihimo sa mando ni Duterte. Duha ngadto sa 12 ka buwan ang suspensiyon sa wala motuman sa mando sa Presidente.
Samtang, si Cebu City Mayor Edgardo Labella nagkanayon nga iyang gipahimutang ang mga apektadong vendor sa Tabo sa Banay food and fruit street luyo sa Super Metro ug ubang lugar nga di makabalda sa dagan sa mga sakyanan.
Ug ang dakong hagit sa LGUs mao ang malahutayon pagpatuman ug pagkuha sa pagsabot sa grupo sa vendors nga lig-ong pulitikanhong pwersa sa matag eleksiyon. Busa, takos kini sa atong pagsuporta ug pagpakabana aron magpadayon. Kita sab tanan ang mabulahan niini. O, dili ba mas wow.