MGA duwa karon
4:30 pm- NorthPort batok Columbian Dyip
6:45 pm- Talk N’ Text batok Phoenix
Mosuway pagkuha’g bahin sa liderato ang Talk N’ Text Katropa sa ilang pagpakigbatok sa Phoenix Pulse Fuel Masters sa main game karong gabii sa Philippine Basketball Association (PBA) Governor’s Cup conference sa Araneta Coliseum.
Ang KaTropa kasamtangang nakigbahin sa San Miguel Beermen sa ikaduhang luna dala ang 2-0 nga rekord sunod sa league-leader NLEX Road Warriors nga naggunit og 3-0 nga baraha.
Sa pagpangulo sa ilang import nga si KJ McDaniels inabagan nila ni Jayson Castro, Tory Rosario ug Roger Pogoy, ang KaTropa yanong ningmakmak sa nag-una nilang duha ka mga kontra nga mao ang Blackwater Elite, 135-107, ug Rain or Shine Elasto Painters, 103-91.
Gipasabot ni TNT coach Bong Ravena nga kinahanglan nilang pahimuslan kining higayuna nga dili pa tantong hago sila si Castro, Rosario ug Pogoy nga pulos sakop sa Gilas Pilipinas nga mokombati sa nagkaduol nga Southeast Asian Games nga ipahigayon dinhi sa nasod sugod karong Nobiyembre 30.
“We need to win as many as we can. Kailangan samantalahin namin. Pahirap ng pahirap yung mga games namin,” matod ni Ravena. “We just have to keep improving.”
Ang Fuel Masters nasagunsonan og duha ka mga pilde sa pagsugod sa komperensya apan ningbawi kini pinaagi sa makutas nga kadaugan batok sa Brgy. Ginebra Gin Kings, 103-101, sa labing ulahi niining tahas.
“Credit to the guys, gustong-gusto nilang manalo,” matod ni Phoenix coach Louie Alas kabahin sa ilang kadaugan batok sa Gin Kings, nga usa sa sayong mga paborito nga mopatigbabaw ning komperensyaha.
Ang ilang kadaugan batok sa Gin Kings gituohang makahatag og dugang moral sa Fuel Masters.
Sa premirong duwa, magsangka ang Columbian Dyip batok NorthPort Batang Pier.
Ang Dyip ug Batang Pier parehong naggunit og 1-1 nga rekord. (ESL)