ATONG bantayan ang accomplishment report nga ipahibalo sa Department of the Interior and Local Government (DILG) labot sa clearing operations sa mga publikong kadalanan nga ilang gimando ngadto sa tanang local government units (LGUs) sa tibuok nasud.
Suma ni DILG Secretary Eduardo Año nga ang performance sa mga LGUs sa paghipus sa mga nakababag sa kadalanan madetermina karong Biyernes, Oktubre 4.
Di lang ang ilang accomplishment report ang atong bantayan, apan mas labaw na ang ipahamtang nga silot sa mga local officials nga napakyas pagbawi sa publikong kadalanan sulod sa 60 ka adlaw subay sa mando sa atong pangulo.
Giingon ni Año nga ilang patubagon ang mga local chief executives (LCEs) nganong wa nalimpyohan ang publikong kadalanan nga hinungdan sa paghuot sa trapiko.
Giingon sa kalihim nga gawas sa mayor, manubag sab ang bise mayor ug miyembro sa konseho kung masuta nga di maayo ang ilang performance.
Bitaw, kung mahitabo nga masuspenso ang mga opisyales sa munisipyo, siyudad o probinsya tungod kay wa nakahimo sa ilang trabaho, aw, mas nindot aron mahimo silang sumbanan sa uban.
Sama sa kaso sa Samar diin giingon nga duha na lamang ang nahibilin nga konsehal tungod kay nasuspenso ilang mga kaubanan lakip bise mayor tungod sa maong salaod.
Uy sa mga walay bayag nga opisyales sa gobyerno, kung padayon nga di ninyo ipatuman ang kamandoan sa pangulo, aw, mamiligro gyud mo kay silotan ang angay silotan.
Ambot lang kaha dinhi sa Davao City, kay sa akong lantaw, wa pay gihimo ang City Transport and Traffic Management Office gawas sa ilang gipadala nga notice of violation sa kapin gatus ka malapason nga mga tag-iya og establisemento.
Nganong nahimo sa Marikina City ang paglimpyo sa ilang mga publikong lugar, unya di mahimo sa ubang lugar sa nasud sama dinhi sa dakbayan?
Kung ikompara nako ang Marikina City (kay nakaadto man ko didto) sa kalimpyo ug kahapsay sa ilang kadalanan ug kasapaan, layo ra gyud kaayo
ta, mga silingan.