NAG-andam ang Mandaue City ug ang ICanServe Foundation Inc. og nagkadaiyang mga kalihukan karong Oktobre sa pagsaulog sa Pink October aron sa pagpasiugda sa breast cancer awareness.
Ang Pink October usa ka adbokasiya sa tibuok kalibutan aron hatagan og pagtagad ang mg breast cancer research, diagnosis ug treatment effort ug ang paghatag og suporta sa mga pasyente nga apektado sa maong sakit.
Suma ni ICanServe Cebu coordinator Mary Anne Solomon nga sa tanang klase sa cancer, ang breast cancer ang adunay purohan nga matambalan kon mahibaw-an kini og sayo.
Tungod niini, giawhag ni Solomon ang katawhan, babaye man o lalake, nga magpa-screen na sa ilang ipahigayon nga breast cancer screening sa Parkmall, matag Biyernes ug Sabado, sugod Oct. 11,2019, gikan sa ala una sa hapon hangtod sa alas 6 sa gabii.
Moimbitar sila og mga surgeon aron maoy mo-screen sa mga pasyente nga mosalmot sa ilang free-screening.
Kon adunay pasyente nga ma-diagnose nga adunay cyst sa suso, i-refer sa Mandaue City Health ang pasyente nga magpa-breast X-ray ug mammography.
Ang ICanServe usa ka grupo nga nag-adbokasiya nga mohatag sa mga kababayen-an nga adunay breast cancer og gahum ug kasayuran kabahin sa cancer aron mobarog ug mutingog sa pag-atiman sa ilang kahimsog para sa ilang kaugalingon.
Dugang ni Solomon nga sa pagsaulog sa Pink October, ila usab nga paambitan ang Pink Health nga mopasiugda og kalihukan sa maayong panglawas.
Tungod niini, mag-organisar sila og serye sa mga sesyon sa Zumba, Aerodance ug pink run
Upat na ka tuig ang panag-uban sa ICanServe ug Dakbayan sa Mandaue.
Sa laing bahin, isip suporta sa breast cancer awareness month, ang mga lokal nga opisyal sa Mandaue naghimo og resolusyon niadtong ika-10 ug ika-11 nila nga regular session.
Mag-pin og pink
Gipatik sa resolution sa ika-10 nga session nga miawhag sa mga empleyado ug mga opisina sa Dakbayan sa Mandaue ang mag-pin o maghigot og pink nga laso o mag-suot og sinina nga kolor pink isip simbolo sa ilang suporta sa breast cancer.
“During October, it has been customary to pin or tie a pink ribbon or wear a pink shirt to show solidarity with breast cancer patients and their families, acknowledge survivors, remember those who succumbed to the disease, and express support to the activities that are being done to fight breast cancer,” matod sa resolusyon. (KFD)