JAS, Davao Occidental -- Padayong nakasinati og mga aftershocks ang mga kalungsuran sa probinsiya diin pinakadaghan dinhi sa maong lungsod.
Sumala sa Philippine Institute of Volcanology and Seismology (Phivolcs) nga resulta kini sa magnitude 6.4 nga linog nga mitay-og sa kadagatan sa probinsiya niadtong Dominggo, Septyembre 29.
Matud sa Phivolcs, gikan alas 12:00 sa tungang gabii hangtud alas 11:52 sa gabii niadtong Lunes, Septyembre 30, nasinati sa probinsiya ang 30 ka mga linog.
Kagahapong adlawa, Oktubre 1, nakatala ang Phivolcs og 11 ka mga linog, diin ang pinakakusog mao ang magnitude 3.2 nga nitay-og alas 6:02 sa buntag.
Natala ang epicenter sa maong linog mga 135 kilometros gikan sa habagatang sidlakan sa Jose Abad Santos ug adunay gilawmon nga 58 kilometros.
Sa pagsuwat ning balita, gilauman nga masundan pa ang mga linog nga masinati sa mga lungsod sa Don Marcelino, Sarangani ug dinhi sa maong lungsod mao nga padayong nag-abiso ang Provincial Disaster Risk Reduction and Management Council ngadto sa publiko nga mag-amping sa kanunay.
Nagpasalamat sab ang katawhan sa probinsiya nga walay gipagawas nga tsunami alert dihang niigo ang kusog nga linog sanglit hasol alang kanila ang pagbakwit sa mga evacuation centers. (Orlando B. Dinoy)