GIPANUBAYAN sa awtoridad partikular sa Sasa Police Station ang insidente sa panglatigo nga natigayon sa Davao City niadtong Lunes, Septyembre 30.
Sa post sa Facebook sa usa ka Edgar (bansagon gitago), iyang gipakita ang upat ka mga hulagway nga parte sa kalawasan nga dunay mga bun-og sa latigo.
"Around 11:20 p.m., beware sa mga taga Sasa dira og dili mo gusto ma-ing-ani sa amoa. Sobra pa sa belting ang gibuhat nila. Gipamunalan mi mga inosente, wala mi sala gibuhat sa ilaha pero gi kalit ra mi og pamunalan mga halason kaayo. Hose gyud ang gibunal, diri ni sa Doña Pilar, Sasa," post ni Edgar.
Sa lain nga post, gipakita sab sa usa ka AL B***ki ang dagko nga mga labhag sa paa diin dunay kapsyon sa post nga, "Mga ya** mo, wala ko nanghilabot sa inyo, ugma lang mo, mangamatay ra gihapon mo."
Ang usa sab ka Jonen (bansagon gitago) nag-post, "Dina gyud ko mo laag ug ako ra usa. Around 11 p.m. 09/30/2019 sa may Sasa habang naga paabot kog jeep pauli, naay lima ka tawo niduol sa akoa ug nangutanan ug taga asa daw ko, then gitubag nako, gikalit rako'g gibadjakan ug natumba ko, mo-action og bunal sa akoa ang duha og dos por dos, maayo nalang si manong taxi driver kay kung wala siya, naa na seguro ko sa SPMC karon."
Usa sa ka binabaye nag-post sa iyang hulagway sa paa nga dunay daghan labhag dihang gikan sila sa usa ka show, kalit sab siyang gibunalan gamit ang latigo sa wa mailhing mga lalaki.
Sumala ni Davao City Police Office (DCPO) Director Alexander Tagum nga away sa gang ang posibleng hinungdan sa insidente.
"As per investigation conducted by DCPO, it seems nga may mga kalabang grupo tong mga local gangs sa Sasa nga naapil pud tong binabaye nga financier aning mga kabataan. I've already directed the commander of Sasa Police Station to investigate and identify these suspects who were involved in these gang riots," pamahayag ni Tagum nga gipadala sa Superbalita kagahapon, Oktubre 1.
Kahinumdoman, patay sa pagpanunggab ang usa ka 32-anyos nga roof installer sa Kasilak, Barangay 76-A, Bucana, siyudad sa Davao human gitabangan sa pito ka mga batan-on nga miyembro sa gang niadtong Biyernes.
Pahimangno ni Tagum sa mga ginikanan nga maymayan ang mga anak aron dili matumpawak sa dautang buhat sama sa riot nga mosangko sa linuog nga krimen.
Pipila sa mga biktima usa ka LGBT diha sa Sasa, duha ka mga lalaking batan-on sa Barangay 37-D, ang usa SK kagawad ug ang usa apo sa kapitan sa barangay.
Sumala sa SK kagawad nga si Loyd, di kakompiyasaan ang mga suspek nga nakamotor kay sa tan-aw nila mopatay gyud. Ulo ang puntirya nga bunalan, kay og wa pa niya masagang ang iyang kamot nga nabali sa pagpamunal, ang iyang ulo ang maigo.
Gamit sa mga suspek sa pagpamunal ang uway, wire ug arnis.
Ang suspek mga lalaki nga nakasakay sa mga motor, naka-helmet o naka-bonnet ug naka-mask. Di makita ang nawong.