40,000 narehistro sa Comelec

NANGAYO og dispensa ang Commission on Elections (Comelec) sa probinsya sa Sugbo sa mga aplikante nga wa na maato pagrehistro atol sa uwahing adlaw sa voters registration tungod sa kakuwangon sa oras ug ekipo.

Matod ni Provincial Eletion Officer Atty. Lionel Castillano nga bisan sa padayong pagpahibaw sa buhatan sa mga satellite registration areas, duna gihapoy mga nagmagahi ug naghuwat nga sa uwahing adlaw pa magparehistro.

“Mangayo lang mi og pasensya nganong nakabalibad mi sa uban. We have limitations as to the number of voter registration machines”, matod ni Castillano.

Gilantaw sa Comelec nga usa ka libo ka mga applikante lang ang moabot sa uwahing adlaw, apan misobra pa kini.

“Naa gyud tay nabalibaran sa mga dagko nga mga cities kay more than we could accomodate, we go beyond the projection nga 1,000. Pero ang galinya sobra pa 2,000, so we have to cut it off kay sirado man gyud na og alas 9 ang mall”, matod ni Castillano.

Base sa nahipos nga datos sa Comelec, moabot sa 40,025 ka mga applikante nga nagpangidaron og 18 anyos taas ang narehistro sukad pa sa unang semana sa rehistrasyon nga nagsugod niadtong Agusto hangtod na sa uwahing semana sa Septiyembre.

Samtang 23, 621 usab ka mga batan-on nga nag edad og 15 ngadto na sa 17 anyos narehistro alang sa Sangguaniang Kabataan (SK) elections.

Matod ni Castillano nga may mga syudad na usab nga mihatag og lugway nga 250 ka aplikante ang masulod matag machine sa target lang unta nga 200 matag voters machine.

“Kon kada machine pinakadako nga mahuman sa 8 hours nga trabaho, 250 daghan ra gyud kaayo. Nakita na man namo kon pila ra gyud ang makaya bisan tulo nalang gani na siya ka steps. Inspite nga nag offsite na mi, daghan gyud gihapon,” dugang ni Castillano.

Samtang subay sa balita, sa padayon nga pagbasa ug pagtuki sa mga senador sa kauluhan sa ipahigayon nga barangay ug SK elections, si Castillano di uyon nga ipahigayon kini sa mga adlaw nga daw magkagubot ang schedule, dili lang sa buhatan, apan lakip na sa mga magtutudlo nga maoy moserbisyo usab atol sa eleksyon.

Matod ni Castillano nga kon mahimo, Abril o Mayo lang gihapon o mga buwan nga sulod sa taas nga vacation period sa mga tunghaan.

Gawas pa niana, gikabalak-an usab sa Comelec ang di maayo nga panahon kon ipahigayon kini sulod sa “Ber” months.

“Dili lang gyud dunganon ang national ug local elections sa same year mamroblema mi kay duha among preparahan. Naay disadvantage. Una the weather, atong mga teachers, our teachers have to rest pod kaysa kon Mayo, wala sila’y klase”, matod ni Castillano.

Niadtong Lunes, Septiyembre 30, 2019 sa botasyon nga 21-0, giaprubahan sa tanang senador sa ikatulong pagbasa ang pag uswag sa barangay ug SK elections ngadto sa Disyembre 2022. (ANV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph