MAS mo-strikto pa karon sa pagdawat og mga job order nga kawani ang kagamhanan sa syudad sa Talisay.
Usa niini mao nga ipaubos sa drug test ang tanang mga mo-apply sa dili pa kini dawaton.
Kini human nga usa ka job order nga babaye nga ang trabaho tigpanilhig o panglimpyo sa da’n ang nasikop sa Talisay City Police, niadtong Septiyembre atol sa buy bust operation. Gani usa gyud sila ka pamilyahan ang nasikop.
Ang maong kawani giila nga si Juneliza Angcon, 48 anyos, taga sitio Kalubihan, barangay Poblacion, sa maong siyudad. Ang nahisgutang kawani ang gitaktak na.
Lakip sa nasikop ang iyang bana nga si Angelito ug ang menor de edad nilang anak.
Gihimo ang operasyon, matod ni Police Captain Nazarino Emia, deputy chief sa Talisay City Police Station, human nga daghan na ang nireklamo nga mga silingan niini. Giingon nga nabantayan nga bisan kinsa nalang ang tawo nga mosud ug gawas sa ilang panimay.
Gikahibulong usab sa mga silingan ang dali nga pag-asenso niini, hinungdan nga gipaubos sila sa surveillance ug didto nag-positibo ang subsob nga pagpaniid.
Sa gihimo nga operasyon, nakuhaan sila og usa ka medium pack ug 16 ka gagmay nga pinakete sa shabu.
Nakuha gikan nila Juneliza ang P36 mil nga balor sa drugas.
Si Talisay City Mayor Samsam Gullas nagkanayon nga nakigtagbo na siya sa ilang Human Resource Officer aron tukion og maayo ang hugot nga pag-screen sa mga aplikante.
Usa sa ilang gilantawan nga himuon, gawas sa background check, mao ang pagsumite sa labing bag-o nga result sa drug test sa mga aplikante.
Dugang sa mayor nga siguruon nila nga wala nay mga kawani sa City hall ang malambigit sa bisan unsa nga paagi sa ilegal nga drugas. (FMD)