MOABOT ngadto sa lima na usab ka mga personnel sa Material Recovery Facility (MRF) sa dakbayan sa Lapu-Lapu ang nag positibo sa gipahigayong kinalit nga drug test sa City of Lapu-Lapu Office of Substance Abuse and Prevention C-Losap niadtong Lunes.
Ang lima nga pulos mga lalaki ubos sa job order (JO) nga mga empleyado.
Gawas kanila aduna pay laing 11 ka mga personnel ang gikatakdang ipaubos sa drug test sanglit wala kini malakip sa uwahing drug test.
Tungod niini gitaktak gilayon sila ni Lapu-Lapu City Mayor Junard “Ahong” Chan sa serbisyo.
Sila ang ika-14 ka kawani sa dakbayan nga nag positibo sa sunod-sunod nga drug test sa buhatan sa Lapu-Lapu City Hall.
Una nang adunay pito nga nag positibo sa gipahigayong drug test sa City Traffic Management System (CTMS) niadtong miaging semana samtang duha usab sa City Disaster Risk Reduction Management Office (CDRRMO) duha ka semana na ang nakalabay.
Kon kahinumdoman, laing lima usab ka kawani sa MRF ang gitaktak ni Chan sa niaging semana gumikan sa pagpangilkil.
Mao usab kini ang rason sumala ni Chan nga nagtukmod kaniya sa pagpa drug test sa mga personnel sa MRF.
“Mao nay isa sa atong gitan-aw kay tawo gani nga mosulod ug in-ana (pangilkil) naay bisyo mao na nga gihangyo nako ang C-Losap nga sila gyud ang isunod ug drug test,” matod ni Chan.
Pahimangno karon ni Chan sa mga kawani nga wala pa moundang sa ilang mga bisyo sa paghunong na samtang wala pa sila masakpi.
Buot ni Chan sa mga empleyado sa pag-amping gayud sa ilang trabaho sanglit wala gayuy luna ang mogamit og ginadiling drugas sa iyang administrasyon.
Kung ugaling adunay kawani nga andam nga moangkon nga nagumon sa ginadiling drugas hayan andam kini ipaubos ni Chan sa rehabilitasyon sa C-Losap sulod sa unom ka buwan apan gikatakdang mohawa una siya sa trabaho.
Sa pagkakaron wala pa usay mga nataktak nga trabahante sa city hall ang nihangyo ni Chan nga mobalik pagtrabaho human nagpositibo sa drug test.
“Mo-undergo siya sa proseso para sa home base rehabilitation unya subject pa evaluate kun mamatud-ang nagbag-o siya. Kana ato siyang tagaan og higayon nga makabalik sa pagpanerbisyo” matod ni Chan. (GCM)