Vendors patindahon, may mga kondisyon

MAKABALIK sa ilang pagtinda ang gatusan ka mga vendor kinsa gipapahawa sa sidewalk gumikan sa clearing operation nga gilusad sa Cebu City Government.

Kini ang gibutyag ni Mayor Edgardo Labella atubangan sa kapin o kulang 50 ka mga vendor nga niadto sa Plaza Sugbo sa Martes, Oktubre 1.

Sila nihangyo sa mayor sanglit wa na silay ikapakaon sa ilang pamilya kay di paigo ang ilang kita matag adlaw sa Tabo sa Banay nga maoy ilang relocation site.

Karong alas 10 sa buntag, Miyerkules, Oktubre 2, adunay meeting nga pasiugdahan ni Cebu City Administrator Floro Casas Jr., Market Administrator Jonil Matuguina ug Raquel Arce, pangulo sa Probe, para han-ayon ang ilang pagbalik og paninda daplin sa karsada apan wa pa masuta kon asa sila dapit ipahimutang.

Apan sa ilang pagbalik sa sidewalk, aduna silay patakaran nga estriko nga ipatuman diin gamay na ang sukod sa ilang lamesa ug para dili mababagan ang pedestrian nga moagi.

Si Labella nakighinabi na kang Senafor Bong Go, kinsa iyang gipananghiran para makabalik ang mga vendor ug matabangan siya pagpasabot ngadto ni Presidente Rodrigo Duterte sa aksyon nga gihimo sa Cebu City Hall.

“Nagka-estorya nami ni Senator Bong Go. Lisod man gud kay adunay order ang Presidente unya og dili nako tumanon, ako man sab ang masuspenso. Pero nihangyo ko ni Senator Bong Go kay ang ako gyung prinsipyo mao ni, political will tempered with compassion and mercy,” pagtug-an ni Labella.

“ ahibawo man mo unsa ang akong dughan. Pasalamat mo ni Senator Bong Go kay gumikan sa iyang tabang, makabalik mo sa pagtinda. Ang importante ayaw gyud mo og babag sa dalan kay kinahanglan aduna moy panginabuhian tanan,” sulti ni Labella ngadto sa mga vendor

Samtang si Bise Mayor Michael Rama nipalanog sa iyang privilege speech sa Konseho.

Siya nipadayag sa iyang kaluoy sa mga vendors gumikan sa pagkawala sa ilang panginabuhian.

Gisaysay usab ni Rama nga nakahinabi na sila ni Go para di mawagtangan sa panginabuhian ang mga vendor.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph