NAPAAMBIT na nako dinhi sa Eskina nga nabuang ko karon sa walking o running isip exercise. Matag adlaw maggahin kog usa ngadto sa duha ka oras sa paglakaw o pagdagan. Ug wa koy plano nga undangon ni. Molakaw ug modagan ko kada adlaw hangtod nga di na nako kaya.

Napaambit na sab nako dinhi nga pipila na ko ka tuig nga nag-intermittent fasting. Di ko mokaon sulod sa disisays ka oras straight - tubig lang, kape nga way asukar, ug tsaa. Ug mokaon ko sulod sa walo ka oras.

Pasabot, magpuasa ko gikan sa alas otso sa gabii hangtod sa alas dose sa udto sunod adlaw - 16 hours. Way pamahaw. Mokaon lang ko sa mga oras gikan alas 12 sa udto hangtod alas otso sa gabii - 8 hours.

Ug sulod ining walo ka oras nga gitugotan nako akong kaugalingon sa pagkaon, kontrolado sab nako kon unsay akong isulod sa akong baba. Wa nagpasabot nga kay nag-fasting man ko sulod sa disisays ka oras, magpalabi na lang pud kog kaon sulod sa walo ka oras.

Unang nawagtang sa among kusina ang mga delata ug uban pang processed foods sama sa hotdog, bacon, noodles ug uban pang mga instant ug ready-to-cook nga mga butang.

Pila na sab ka buwan nga wa na nako tagda ning mga mosunod:

1) Doughnut 2) Cake 3) Ice cream 4) Chichirya 5) Pizza 6) Burger 7) French fries 8) Soft drink

Walo ra ni sa mga butang nga nagpakaaron ingnong pagkaon. Ang tinuod, food-like substances ra ni sila, kon sa iningles pa. Tungod sa proseso nga ilang giagian ug sa mga ingredients nga gigamit, peke na sila nga pagkaon. Makahilo.

Moingon mo, “Kaluoy ni Insoy. Kalami ra ba anang mga pagkaona.” Tubagon ta mo, “Mas luoy mo kon mao ni inyong pirming kan-on.”

Unsa na man lay akong kan-on ug imnon sulod ining walo ka oras?

1) Mga prutas, sama sa apple, saging, orange 2) Utan, labi na nang mga green ang kolor 3) Kamote 4) Rice 5) Mais 6) Mani 7) Tubig, kape, tea 8) Isda, baboy, manok

Dayon mangutana mo, “Unya Insoy, ang beer?” Ug tubagon ta mo, “Laina, maninuod man diay.”

Naa koy gihimong compromise ining beer. Hisgotan nato ni puhon.

•••

Ang akong libro nga “Ang Batang Scorpion: Da Best of Eskina ug Uban Pa,” koleksyon sa akong mga Superbalita kolum, mapalit sa Music Lab, tapad sa Handuraw Mango Square.