ANG kontrobersiyal nga blogger nga si Mocha Uson miluwat sa iyang katungdanan isip assistant communications secretary aron mosalmot sa miaging eleksyon sa buwan sa Mayo ning tuiga. Gusto siyang magkongresista.
Nominado siya sa AA-Kasosyo party-list. Apan wa kini makakuha og igong mga botos aron makaangkon og usa ka representante sa House of Representatives. Pakyas ang tinguha ni Uson nga mahimong kongresista.
Apan wa pa gani molabay ang usa ka tuig, gitudlo si Uson niadtong Septiyembre 23 isip deputy administrator sa Overseas Workers Welfare Administration (Owwa), usa ka ahensiya sa Department of Labor and Employment.
Di ba duna may usa ka tuig nga ban sa mga pildero sa eleksyon nga di matudlo sa bisan unsang katungdanan sa gobyerno? Aplikado ba kini ni Mocha Uson?
Ang Article 9 (B), Section 6, 1987 Constitution, nagkanayon, “No candidate who has lost in any election shall, within one year after such election, be appointed to any office in the Government or any Government-owned or controlled corporations or in any of their subsidiaries.”
Gidasonan kini sa Section 94 (b), Republic Act No. 7160, ang Local Government Code of the Philippines, nga giulohan “Appointment of elective and appointive local officials; candidates who lost in an election:”
Kini nagkanayon, “Except for losing candidates in barangay elections, no candidate who lost in an election, shall, within one year after such election, be appointed to any office in government or any government-owned or controlled corporations or in any of their subsidiaries.”
Apan matod pa sa Commission on Elections (Comelec), way labot niini ang mga party-list groups.
Ubos sa Rule 4, Section 3, Comelec Resolution No. 9366, lagda bahin sa party-list system, “the one year prohibition from being hired or rehired in a public office after their party-list organizations fail to secure the needed votes to qualify them for a seat in the House of Representatives, shall not apply to them.”
Gidasonan kini sa Comelec minute resolution 19-0677 sa Comelec en banc nga nagkanayon nga di aplikado ang one-year ban sa mga nominado sa pildero nga party-list group kay “the nominees are not the candidates but rather the party-list itself.”
Ang partido maoy ang kandidato, di ang nominado. Busa malakip lang ang mga nominado sa mga party-list organizations sa one-year ban kon amendahan sa Kongreso ang balaod sa party-list system. (edbarrita@gmail.com)