GI-AWHAG ni Cebu City Councilor Antonio Cuenco nga mohimo ang mga law enforcement agencies, ang Philippine National Police (PNP) ug Philippine Drug Enforcement Agency (PDEA) og inventory sa mga drugas nga ilang nasakmit atol sa mga operasyon. Kini aron dili magamit sa mga badlungon nga mga pulis ug PDEA agents pag-recycle o ba kaha gamiton para planting of evidence sa ilang operasyon. Kining maong mga kabalaka ug kahingawa ni Cuenco dili layo sa posibilidad.
Makadaghan na kita makadungog aning binoang sa ubang mga pulis nga dili i-diga tanan ang nakompiskar nga mga drugas. Kon pananglitan makakompiskar sila og usa ka kilo nga shabu, pipila ka gramo ra ang ideklarar sa media ug ang uban taguan aron ibaligya pag-usab. Mismo ang pinaka-taas nga opisyal sa PDEA, Director General Aaron Aquino, niangkon aning maong modus atol sa hearing sa Senado.
Pero ang dakong binoang sa mga pulis ug PDEA agents naa sa actual operation labi pa kon mo-serve sila og search warrant sa usa ka suspetsadong drug dealer. Tulison nila ang ilang subject. Bisan ang mga personal nga butang labi pa kon konpirmado nga nahilambigit sa illegal nga drugas. Bisan ang kuwarta nga kita sa ilang legal nga negosyo kuhaon.
Mao nay gi-ingon nga legal nga tulis kay aduna may search warrant. Ang ubang pulis gani kon ilang mahibaw-an nga adunay mga sakyanan ang ilang mga subject, mag-andam na og deed of sale. Ug inig raid, ilang pugson pagpa-pirma ang ilang gi-raid sa deed of sale aron ingnon nga ilang gibaligya ang maong sakyanan. Kon mahibaw-an nga adunay deposito ang ilang subject, ila kining dad-on sa bangko aron pa-widrohon sa ATM.
Mao nang dili masumpo kining pagkuyanap sa illegal nga drugas gumikan kay daghang mga badlungon nga mga awtoridad. Dia nabaniog na kining mga “ninja cops,” kining grupo sa mga pulis nga maoy mo-recycle sa ilang makompiskar nga drugas. Aw, kon tinud-on ni Presidente Duterte ang iyang bahad ning maong mga pulis, mas una pa kining mamatay kay kaniya. (bobbygnalzaro@gmail.com)