MOPAHIGAYON og mga duwa ang Philippine Basketball Association (PBA) sa United Arab Emirates (UAE) sulod ning semanaha alang sa overseas Filipino workers.
Ang mga kombati nga malantawan sa mga OFW pulos tipik sa nagpadayong Governor’s Cup conference.
Ugma sa lawom sa gabii (Manila time), magsangka ang San Miguel Beermen ug NLEX Road Warriors sa Coca-Cola Arena sa Dubai.
Inig ka Sabado sa alas 10:00 sa gabii, ang Road Warriors mopakita na sab og aksyon ug ning higayuna, batok sa crowd-favorite Brgy. Ginebra Gin Kings.
Nagsilbe kining tubag sa PBA sa mga hangyo sa OFW sa UAE nga hidlaw nang makasaksi sa personal og panagsangka sa labing unang professional nga liga sa Asya.
“Actually, nag-pe-prepare na kami, unti-unti,” matod ni NLEX coach Yeng Guiao nga napatik sa PBA.PH.
“Kasi hindi naman pupuwede na kalaban mo San Miguel ngayon tapos the next day kalaban mo Ginebra. Ang preparation mo lang pagka-gising mo ng umaga, eh.”
Sa iyang bahin, si San Miguel coach Leo Austria miangkon nga dili kini sayon nga tahas alang kanila hilabi na nga adunay impresibong import ang NLEX.
“NLEX for me is really a contender,” asoy ni Austria.
“With their last three games I think they got a lot of confidence. Maybe because of the help of their import. They’ve found a good import who can really play in the shaded area. Very dominant. I think we have to find a gameplan to limit him. Of course, we cannot stop him.”
Nidugang si Austria nga usa sa ilang tutokan og insakto mao ang lokal nga pambato sa NLEX nga si Kiefer Ravena. (ESL)