CATBALOGAN City, Samar -- Menor de edad nga babaye gikulata sa usa ka American national kay wa mosugot nga maghilawas sud sa giabangan nga apartment.
Kini nahitabo sa apartment nga giabangan sa langyaw pasado alas 12 sa kaadlawon sa Miyerkules sa Barangay Canlapwas ning siyudad.
Ang suspek giila nga si Nader Haleem, 34, American national, taga 14131, Collejiate Circle, Releigh North Carolina.
Ang biktima gitago sa ngan nga Apple, 17, usa ka estudyante. Pasado ala 1 sa kadlawon nadawat sa kapulisan ang report hinungdan nga si Police Master Sergeant Jory Uy niresponde sa sumbong.
Base sa imbestigasyon, giimbitar sa Kano ang biktima nga mag-inom sa iyang apartment.
Human sa duha ka oras nga tagay sa ilimnon nga makahubog, nagtuo ang Kano nga makatagay usab sila sa lawasnon nga kalipay. Apan ang biktima nananghid nga mouli na, pero wa mosugot ang Kano gawas lang kon maghilawas sila.
Dugang sa report, gihulga pa sa Kano ang biktima nga patyon kon di makighilawas.
Nipalag ang biktima apan gikulata hinuon sa suspek. Ang dalaga nakaangkon og mga bun-og sa lawas.
Naa na karon sa kustodiya sa kapulisan ang suspek ug padayon ang imbestigasyon. (JKDP)