MOABOT sa P13.6 million nga balor sa illegal nga drugas ang nasakmit sa mga sakop sa Provincial Intelligence Branch sa Negros Oriental Provincial Police Office nga gipangulohan sa ilang hepe nga si Police Lieutenant Colonel Wilfredo Alarcon.
Niabag sa operasyon ang Dumaguete City Police Station nga gipangulohan ni Police Lieutenant Colonel Rayman Tolentin atol sa entrapment operation sa Purok Makugihon, Barangay Camanjac, Siyudad sa Dumaguete, alas 5:10 Lunes sa hapon, Oktobre 1.
Ang nasikop giila nga si Jake Lester Alesna Esquilona, 22, taga Sitio Kabulakan, Barangay Poblacion, lungsod sa Sibulan, Negros Oriental.
Nakuha gikan kaniya ang usa ka dakong putos sa gituohang shabu nga motimbang og duha ka kilo nga adunay Dangerous Drugs Board (DDB) value nga P13,600,000.
Lakip sa nakuha ang motorsiklo sa suspek nga Suzuki Raider ug usa ka cellular phone niini diin naa ang tanang komunikasyon sa naghatag sa illegal nga drugas kaniya.
Matod ni Tolentin nga sigun sa pamahayag ni Esquilona nga usa lang siya ka drug courier ug wa siya makaila kinsa ang iyang hatdan ug kinsa usab ang naghatag kaniya.
“Ang iyang ingon courier ra siya, wala daw siya makaila sa naghatag niya ug kinsa ang hatagan. Usually mao nay estorya sa mga tig deliver lang nga madakpan,” matod ni Tolentin.
Natingala usab siya nga ingun niadto ka dako ang nakasulod sa Siyudad sa Dumaguete hinungdan nga ilang pakusgan ang ilang intelligence monitoring.
Gikan kang alyas Gong-gong nga nabilanggo sa New Bilibid Prison ang supply sa illegal nga drugas, matod ni Alarcon.
Sukad pa niadtong Agusto ang ilang monitoring kang Esquilona human gitudlo sa mga nangadakpan sa ilang anti drug operation nga nagagikan kaniya ang supply sa illegal nga drugas.
“Ang iyahang giingon nga ang source sa iyang drugs kay gikan ni alyas Gong-gong nga naa sa NBP sa New Bilibid Prison. Dayon koan man gud ni siya nga operation product ni sa among operation since August. Unya kasagaran sa mga nangadakpan sa Siliman ma link sa iyaha ni Jake,” matod ni Alarcon.
Padayon pa karon ang pag imbestigar sa kapulisan sa dinakpan kon asa niya i-deliver sa Siyudad sa Dumaguete.