MAPASALAMATON ang kapulisan sa dakbayan sa Talisay sa publiko human aktibo sa pagpanginlabot ug pagtaho niadtong mga nalambigit pa sa drugas.
Tungod niini, laing duha ka durugista sa Sitio Mahayag, Barangay San Isidro, Talisay ang nasikop atol sa buy bust.
Nakuhaan usab sila og armas.
Gisusi karon sa Talisay City Police kon wala ba magamit ang armas sa mga krimen, sama sa pagpanulis ug mga pagpamusil.
Ang subject sa operasyon mao si Aldebaran Saavedra, 40, nga nagpuyo sa maong dapit, kinsa niangkon ra usab dayon nga siya namaligya.
Matud niya nga kini ra iyang paagi nga makatabang sa nagkalisud niya nga pamilya.
Nasikop usab ang iyang kauban nga si Brian Luague Raga, 39, taga Tabunok, Talisay.
Gitug-an ni Police Captain Nazarino Emia, ang deputy chief sa Talisay City Police Station, nihimo sila sa operasyon, pinaagi sa mga report sa concerned citizen.
Pipila na ka sumbong ang ilang nadawat kalabot sa sa ilegal nga kalihukan nila ni Saavedra, diha sa ilang panimay, nga nahimutang sa suok kaayo nga bahin sa barangay San Isidro.
Mobalor sa dul-an P10 mil ang mga nakuha nga gidudahang’ shabu, ingon man timbangan alang na sa pagrepake, ug ubang drug paraphernalia.
Nasakmit usab ang usa ka black widow caliber .22 revolver gikan kang Raga nga adunay lima ka bala.
Dugang awhag ug panawagan sa kapulisan ang hugot nga kooperasyon sa kampanya batok sa gidiling drugas bisan sa sekreto nga pamaagi.
Samtang, ang tibuok komunidad maoy mabulahan sa maong kampanya. (FMD)